KON naga-ulan, bisan sa malip-ut lang nga panahon, nagatener ang tubig diri sa bal-ut sang nagaatubangay nga duha ka mayor nga building nga wala ma-sementuhan sa Mandurriao National High School.
Ina – sa hangop ta sa madugay nga paglabay naton diri pakadto sa Iloilo Supermart – tungod wala man sing alagyan ang tubig pagwa sa drainage sa kilid sang dalan nga sa kilid man lang sang eskwelahan.
Otherwise, wala tani gadugay ang pagpondo sang tubig diri nga ginalikawan sang mga estudyante sa pag-agi, labi na gid kay nagalunangon ini sa diutay lang nga wisik sang ulan. Lamawan gani ang gwa sini kon sige ang ulan diri.
Diri na gid lang gani naga-agi ang mga estudyante sa magamay apang sementado nga alagyan sa atubangan sang ila mga kwarto sa tabuk lang sang naga-atubangay nila nga mga building.
Ining gamay nga alagyan (mga duha lang ka tapak ang lapad seguro) yara sa bal-ut nga espasyo sa tunga sa diin nagatener ang tubig kon mag-ulan tungod manubo ini sa magamay nga alagyan sang mga estudyante. Mga anom ka tapak man guro ang kalapad sining espasyo.
Ang siste pa gid amo nga kon mag-tener ang tubig diri sing madugay nagabaho ini sang baho sang kanal. Kag magtahaw lang ang baho sini kon magmala ini sa init sang adlaw sing inadlaw tubtub senemana kon dugay-dugay gawa ang pagtener sang tubig.
Kon mag-agi gani kita diri pakadto sa Iloilo Supermart gabalingasaw gid ang baho sini tubtub sa dalan sa kilid sang eskwelahan.
Natingala kita kon ngaa daw sa wala lang sa buot sang mga estudyante kag bisan sang mga manunudlo ang ining kahimtangan nila dira.
Nagareklamo gid man seguro, ugaling ginaantos na gid lang nila ini kag gapangamuyo na gid lang nga aktuhan ini nga problema sang gobyerno, nga sa kadugay wala man sing ginahimo.
Ining proyekto nga dalan iya seguro sang gobyerno nasyonal tungod ang bilog nga eskwelahan iya ini proyekto.
Kon iya ini nga proyekto sang gobyerno nasyonal, wala sing animo seguro ang nagtukod (contractor) ukon nagpatukod (DPWH) sining alagyan pasulod sa eskwelahan.
Ebidensya ini sang kapalpakan sang gobyerno. Daw aloy nga lipong nga ang makakaon malingin ang iya ulo. Sa sini lang nga gamay nga problema, indi pa ninyo makita kag matagaan ini sing solusyon?
Indi kamo magsiling nga na-short ang inyo budget agud indi malakip ining proyekto sa ining alagyan pasulod sa eskwelahan. Seguro may nag-cut sang budget nga madyekero. Indi ayhan amo ina ang natabo? Ti, pabay-an ta lang ini nga problema?
Samtang, nagaantos ang mga estudyante, ang mga manunudo kag ang mga nagaduaw sa eskwelahan sa kabaho sining nagatener nga tubig.
In fact, indi lang perhwisyo ini sa pagtuon sang mga kabataan kag ikaayong lawas sang tanan nga nagapausbong sang baho kanal sini. (w_mateojr@yahoo.com/PN)
