ASUD-ASUD ang insidente sang pagpamatay nga ginabilin lang sa higad sang dalan, lunsay ginabaklid, ginabugkusan agud nga ang baba ang indi makatuga sang gahod kag may pilas tuga sang pagluthang.
Madasig maghatag sang reaksyon ang Police Regional Office 6 nga ‘isolated’ nga kaso lang ang insidente kag wala sang kabalak-an ang nagahimo sang maayo.
Wala pa man nakapadalom sang imbestigasyon ang kapulisan apang ang ila lider ang madasig na nga magpanabon sang ila kapaltahan.
Wala kuno sang ‘vigilantes’ apang ngaa may nagakapatay? Mahilig magtabon kag pagpalutaw sang istorya si Police Brig. Gen. John Bulalacao sang PRO-6.
Imbis nga padalman ang kabangdanan ukon motibo agud nga matumod ang mga suspetsado, mas gin-una nila hublasan ang mga biktima kaangay sa natabu sa magtiyo nga Eribal nga ginbilin sa bahin sang Flood Control Project sa Barangay Balabago, Jaro.
Kon wala napatay ang magtiyo, wala nila naangot ang mga biktima sa ila ginapasuni nga kahilabtanan sa pila ka krimen nga nagluntad. Kon maathag, mabakod kag matuod ang ila impormasyon, ngaa wala nila napasakaan sang kaso?
Paano mapangapinan sang mga biktima ang ila kaugalingon bangud nga napatay na sila? Kon sadto may impormasyon ang mga pulis, ngaa wala nila ginhatagan sang atensyon agud nga mapasabat sa krimen kon sa diin sila may kahilabtanan?
Ginapinta sa pang-ino-ino sang tawo nga indi dapat magkanugon nga sila ang mapatay bangud sila ang may madamo man nga salabton sa kasuguan? Kon sila ang nangin sentro sang imbestigasyon paagi sa paghublas sa kon ano nga sahi ang ila pagkatawo, makabulig bala ini sa pasolbar sang krimen? Mapasabat bala ang mga nagpatay sa ila?
Pila na ka insidente ang nagluntad nga wala sang solusyon nga nahatag ang kapulisan. Madamo na sang biktima sang riding in-tandem nga tubtub subong wala sang kaathagan, wala sang development ang kaso, kag ginapalipat-lipatan na lang sang kapulisan.
Paano magtagam ang nagahimo sang krimen kon lawlaw ang pulis sa pag-imbestigar kag pagpasabat sa mga nagahimo sang krimen?
Naga-utoy-utoy lang sang kadlaw ang mga kriminal bangud nga imbis sila ang tutukan kag hatagan sang atensyon sa insidente, ang mga napatay pa ang ginahublasan, ginahumlad sa publiko ang detalye sang ila pagkatawo kag mas una pa nga nahusgaran bangud sa pagpinta sang pulis sa kon ano sila nga sahi sang personalidad.
Makaluluoy lang ang mga biktima nga wala sang hustisya nga naagom bangud sa kalay-od sang pulis sa ila imbestigasyon.
Umpisa nga nagpungko si Police Col. Martin Defensor Jr. bilang city director sang Iloilo City Police Office, wala siya sang may mapabugal nga nasolbar nga kaso sang riding in-tandem nga iya ginpangako antes siya magpungko nga iya solbaron kag pasabton ang mga tagpatay.
Nagasagsag ang mga kriminal sa ila ginahimo bangud sa kalay-od sang mga pulis.
Tama na ang paghimo sang palusot nga imbestigasyon. Husto na nga drawing sang mga sitwasyon kag pagtabon sa inyo nga kalawlaw.
Tion na nga ipakita ang inyo agrot kon paano kamo ka hangkilan sa pagsolbar sa mga insidente, nagahulat ang mga biktima sa inyo ginapasalig nga paghatag sang hustisya. (bertladera@gmail.com/PN)
