SI GOV. Art. Defensor masaylo sang iya registration sa Dumangas, Iloilo? Sudlon nya ang ridor ni Cong. Ferj Biron?
Madamo lang sang palutaw estorya basta politika. Madamo sang mga stratehiya agud makugmat ang kasumpong sa politika.
Pero kun kamo pamangkuton, malutos ayhan ni Defensor si Biron sa balwarte sang kongresista?
Kun sa tercer distrito siguro makasiling kita nga indi gid matumba ang mga Defensor. Amo man ina ang mga Biron basta quarto distrito, indi sila matay-og. Napamatud-an na ini ni Biron sang ginsulod ni anay Gov. Niel Tupas Sr. ang iya distrito agud sumpungon ang utod sang kongresista nga si Jun-jun Biron.
Katuyuan kuno sang plano ni Gob. Defensor nga magsulod sa quarto distrito agud ma-distract si Biron sa iya kandidatura sa pagkagobernador sa probinsya sang Iloilo kasumpong ang anak ni Defensor nga si 3rd District congressman Arthur “Toto” Defensor Jr. Mapadalagan sa pagkakongresista si Gob sa quarto distrito agud indi maka-focus sang iya kampanya si Biron kag sigurado nga makabatyag sang kabalaka ang kampo sang negosyante sang bulong.
Kun basehan ang mga palutaw sang estorya, mangin mainit ang engkwentro sa pagkagobernador sa probinsya sang Iloilo. Indi makalaum sang sigurado nga kadalag-an ang kampo sang mga Defensor bangud mabakod man si Biron. Maluwas nga maayo man ang kredibilidad, may kwarta nga galastuhon sang election. May lehitimo nga negosyo nga makatipon sang kwarta para pangwas-ag sat i-on sang election. Indi man ina sila mag-ako pero pareho lang man sila nga nagasabwag sang kwarta. Ang punto lang diri, sin-o ang magasabwag sang mas madamo nga kwarta?
Kun sin-o ang politiko nga may alyansa sang duha makasiling na nga bisan paano makita na ang padaug sa election. Mabudlay magpili kay pareho lang sila nga may kapasidad, may kredibilidad kag katampad sa pagserbisyo. Wala sila sang isyu sang kurapsyon. Ang padaug diri kun sin-o ang may konek sa tawo kag may mas dako nga pakumkom sa nagaboto.
Palutaw estorya para makabatyag sang kakugmat ang kontra.
Palutaw estorya agud may padaug sa gyera. (jpranco1975@gmail.com/PN)
