KABAY nga ang pamahog sa kabuhi sang mga obispo sang Simbahan Catolica pamahog gid lang kag indi pagatumanon sang kon sin-o nga nagapamahog nga ini.
Ini nga pagpamahog sa mga Obispo ginpahibalo na gani ni Luis Cardinal Tagle sang sini lang kay Presidente Rodrigo Duterte mismo.
Posible nga tuga ini sang sugyot sang Presidente sadtong Disyembre 2018 sa diin nagsiling siya nga pamatyon ining mga Obispo.
“These bishops, kill them. They are useless fools. All they do is criticize,” siling sadto ni Duterte sa mix nga English kag Filipino, sunu sa isa ka pamantalaan nasyonal.
Ginatumod ining pag-criticize sang Presidente sa mga obispo nga myembro sang Catholic Bishops Conference of the Philippines, ukon CBCP), sa padayon nga Gyera kontra Droga sang Gobyernong Duterte.
Gina-kwestyon nila diri ang pagpamatay sa mga durugista nga para sa ila, sa madamo nga beses, ginhimo nga wala sing “due process”, ukon nagakaigu nga proseso sunu sa kasuguan, sa diin mga 5,000 na ang napatay sang kapulisan.
Angot na gani ini seguro sa pagpangamuyo sang isa ka pari, si Father Noel Gatchalian, sadtong Setyembre 2018 nga tani magmasakit ang Presidente sang ginbalita nga nagmasakit siya, nga gin-deny sang Presidente.
Para sa Presidente pangamuyo ini agud mapatay siya.
Siling gani sang Presidente: “Eh di sabihin ko na lang din ‘Mamatay sana kayong lahat ng venereal disease.’”
***
Gin-deny sang Presidente kag sang iya taghambal nga luyag niya ipapatay ang mga obispo sa iya ginhambal kontra sa ila.
“Kilala naton ang Presidente sa iya hyperbole (lapaw nga sugid) nga, masami, kon indi lahog wala man sing kahulugan nga malain,” paathag gani sang iya taghambal nga si Atty. Salvador Panelo.
“Abogado siya kag nahibala-an niya kon ano ang maayo kag malain,” dugang gani niya nga paathag.
Ang problema lang da kay bisan langas-langas lang ini (kon langas-langas gid man), gina-seryoso ugaling ini sang iban, labi na gid sang iya mga fanatico nga sumulunod, ukon mga paryente nga todo pangapin sa iya.
In fact, sa sulat ni Cardinal Tagle, ginsiling niya nga ang pagpamahog sa mga obispo halin sa “someone claiming to be working for the president’s family,” ukon malapit sa pamilya sang Presidente.
Sa mapati man ukon indi ang Presidente sa sining pagpamahog sa mga obispo, ginpakamaayo na gid lang sang Presidente nga ibalik ang pamahog sa sining mga nagapamahog.
“Indi ninyo pagtandugon ang mga pari (priests), wala sila labot sa pulitika!” siling ni Presidente.
“Muslim man ukon Kristiyano, wala sila labot sa amon pamulitika. Lay off! Untati ninyo ining pagpamahog sa ila, ukon ako ang inyo kontra!” dugang niya.
***
Kabay lang nga ang pagpamahog nga ini sa mga obispo sang Simbahan Catolica indi man ibalik sang mga fanatico sang simbahan kontra sa Presidente, nga indi katoliko, tungod sa sining pasalig sang Presidente nga indi sila pagatandugon.
Mabudlay ang away relihiyon. Ang aton kasaysayan nagapakita nga maduguon ini kag wala sing ginapasin-o nga Presidente ukon Prime Minister ukon sin-o man nga lider.
***
Nagtanyag ang kapulisan, paagi kay Police General Albayade, sing bulig para sa seguridad sang mga obispo kag mga kaparian, sa kabug-usan.
Apang wala ini ginbaton sang kaparian sa ila tindug sa padayon nga pagserbisyo sa mga tumuluo agud isulong ang paghigugma kag kalinong sa tunga sang katauhan. (w_mateojr@yahoo.com/PN)
