MAKABUGTAW ka ayhan sa bag-o nga istilo sang pamukaw? Tuhay sa kinaandan ang ma-eksperyensyahan sang mga pumuluyo sa syudad sang Iloilo nga nahidlaw na nga magsadsad kag magbatyag sang linagumba sa pagsaulog sang Dinagyang festival.
Ang Dinagyang Festival 2023 “Pamukaw” natalana sa Biernes, Disyembre 16, sibu sa una nga adlaw sang 9 ka adlaw nga Aguinaldo Masses ukon ang “Simbang Gabi” antes ang Christmas Eve.
Mas makahatag ini sang kahulugan sa ispiritwal nga pagsaulog tungod nga mas naangot na ini sa pagsaulog sang paskwa kag relihiyoso nga selebrasyon sang Dinagyang.
Madamo ang mamag-uhan sini tungod nga kinahanglan nga magbugtaw sing temprano agud nga masaksihan ang padihot sa sini nga aktibidad. Madamo ang nagalaum nga magagutok ang mayor nga mga dalanon, ilabi na sa calle real, kon sa diin kinaandan nga ginahiwat ini.
Apang bentaha naman para sa mga nagatambong sa Simbang Gabi tungod nga may sug-alawon sila nga tuhay nga aktibidad nga mas makapapukaw sa ila katuyo ilabi na nga naga-amat-amat na tugnaw ang huyop sang hangin.
Posible nga madamo sang excited nga magbugtaw sing aga pa agud nga makatambong sa una nga Simbang Gabi kag may iban man nga posible nga maburaw, gani daku ang mabulig kon may nagapamukaw kag ang lagbong sang tambor makabulig sa pag-aligmat para sa mga nagaplano nga magsimba.
Kahibalo kita nga ang Pamukaw isa ka lihok nga nagatuyo nga ipaalinton sa mga pumuluyo, iplastar sa ila panimuot kag modo nga maghanda na para sa tuigan nga piyesta sang syudad sang Iloilo nga natalana sa bulan sang Enero 2023.
Sa nasiling na, ang Pamukaw hiwaton sa kaagahon kag indi na sa naandan naton nga paghiwat sa hapon ukon ala una pa lang sang hapon ginasarado na ang trapiko agud nga hatagan sang ligwa ang pagpasundayag sang mga tribu.
Wala sang parada ukon pasundayag sang mga tribu sa hapon sa sini nga tuig bangud lunsay mga manugtambor lamang ang magalibot sa syudad sang Iloilo kag magapalanog kag magpalinagumba sang ila tambor.
Wala sang may matabu nga pagtublag sa ilig sang trapiko sa hapon, wala sang pagpasirado sang dalan kag tuhay ini sa kinaandan naton nga ginasaksihan.
Ang mga tiglawas sa kada tribu ang magapasakop sa programa sang Pamukaw sa atubang sang Iloilo City Hall, pagkatapos sang Aguinaldo Mass sa Biernes.
Matuod nga indi naton magulpi ang tanan. Kinahanglan naton sang transition ukon amat-amat lang nga lihok tungod nga halos duha ka tuig man kita nga wala nakahimo sang naandan naton nga lihok sa Pamukaw bangud sa pandemya.
Posible nga ang pag-untat sang sini nga lihok nakahatag sang ideya sa mga tagpatuman sini kon ano pa gid ang mga bag-o nga dapat himuon, kon ano ang iban pa nga lihok nga pwede maangot sa sini nga aktibidad kag kon paano pa gid maimprubar. May mga bagay nga ginakonsiderar, may mga ideya nga gina-entertinar, kag may mga plano nga gina-implementar para sa pagbag-o gikan sa naandan nga pagsaulog.
Matuod nga madamo ang matingala, posible nga madamo ang malas-ayan tungod indi nila masaboran ang nauna na nila nga natilawan nga sabor sang Pamukaw.
Kahibalo kita nga tuman na ka gutok sang syudad, kag nagaginutok ang mga salakyan, naga-igod ang mga salakyan kag kinahanglan nga desinyuhan na sang mga lihok nga indi tuman nga makahatag sang huol sa mga pumuluyo.
Indi kita malipat nga sadto, sa tagsa ka maghiwat sang Pamukaw, nagahingagaw transakyon ang iban nga dapat matapos sa aga pa lamang ukon indi sila dapat maabtan sang alas una agud nga indi masablagan ang ila transaksyon.
Bisan ang mga empleyado, mga estudyante kag ang mga naga-deliver nagahingagaw nga makagwa gilayon sa ila lugar agud nga indi maguot sa trapiko. Malawig ang pagpanglakaton tubtub nga makalab-ot sa bahin nga may jeep na nga masakyan.
Ang Pamukaw isa ka lihok nga patimaan sang panugod sang Dinagyang, isa ka lihok nga may angot sa relihiyoso nga pagsaulog, isa ka lihok nga mas makapahugot sa pagtuo sang pumuluyo, isa ka lihok nga nagahatag sang kaantanan sa paskwa, isa ka lihog nga makapukaw sa pagbaton sang bag-o nga ideya sa pagsaulog nga wala may matuga nga huol ukon sablag.
Saulugon naton ang ini nga higayon sa bag-o nga panahon pagkatapos sang pandemya. Sakdagon naton ang selebrasyon nga may paghalong tungod yara pa ang risgo sang pandemya sa aton palibot.
Kabay nga ang Pamukaw magpukaw gid sa balatyagon sang kada isa kag magsaulog nga nga may kasadya kag paghiliusa. (bertladera@gmail.com/PN)
