MADAMO sang mga hilikuton nga sang una mahimo ta apang indi na subong.
Sang una ordinaryo lang magkaon sang eat-all-you-can sa mga dalagko nga kalan-an sa mga malls ukon diin man nga bahin sang syudad sang Iloilo.
Bisan ang tradisyon nga paghalok, beso-beso, kumusta kag hakos indi na natun mahimo bisan ano pa kita ka kalangkag sa pagkita sa atun himata, abyan ukon bisan kakilala lang.
Kaangay nga ginligwat sang Dyos ang atun mga kinaandan kag ginbutangan sang limitasyon ang tanan.
Apang kun kamo lang, maayo man gani ini. Kay sang una kun dengue lang, bisan ginahambalan nga maninlo sa palibot nagapabungol lang. Kun trangkaso kag sip-on lang ang uso, wala ganahugas sang kamot.
Pero subong nga may coronavirus disease 2019 ukon COVID-19 na, tanan matinandaon na sa paghugas sang kamot ukon paggamit sang hand sanitizer.
Bisan ako sang una indi makasaho maggamit sang mask. Natandaan ko pa sang una sang bag-o lang ako gwa sa hospital matapos ang operasyon, ginhatagan ako sang doctor sang isa ka box nga disposable surgical mask apang wala ko masyado nagamit. Ato kuntani protection man sa akon sa mga impeksyon kag yab-ok sa palibot. Apang subong nagmanton man kita maggamit sang mask.
Sa pihak sini tanan, may mga tawo pa gid man nga indi makasaho sang bag-o nga nomal. Padayun ang paglapas sang mga pagsulondan natun. Mga tawo nga wala nagakahadlok sa posible halit sa ila kaugalingon kag sa ila pamilya.
Apektado na ang pagtuon sang mga estudyante. Indi man basta lang makabalik sa mga buluthuan bangud sang ginapatuman nga physical distancing. Tanan apektado gani tanan nabudlayan sa pagsinalayo.
Ini na ayhan ang mga pagtilaw nga dapat natun maagyan agud makabugtaw kita sa atun mga kakulangan sa tagsa-tagsa?
Ini na ayhan ang ti-on nga magbag-o kita sang atun pagginawi” Pahanumdom na ayhan ini sa atun sang Makaako?
Kun malampauwasan natun ini, ayhan may leksyon man kita nga matun-an kag madala bilang ubay sa masunod nga bahin sang atun kabuhi. (jpranco1975@gmail.com/PN)
