NATAPOS na ang kapiyestahan sang patron sang Jaro kag sang Western Visayas nga si Nuestra Señora de la Purificacion y Candelaria.
Matalupangdan nga wala nagginutok ang mga sumilimba bangud sa katagam sa mga nabatian nga huring-huring tuhoy sa posible himuon nga kalakasan sang mga hurong nga tawo.
Apisar nga wala ginahatagan sang bug-at sang kapulisan ang impormasyon, apang indi malipod nga lubos ang ila pagpanigana agud masiguro nga indi matabu ang ginalikawan nga ginakahadlukan sang tanan.
Naapektuhan ang pagpangadi sang mga tawo sa sulod sang simbahan. Gin-unahan sila sang kabalaka kag katagam rason nga sila ang naglikaw sa pagsimba.
Apang, padayon naman ang pagbaligya sang mga negosyante sa sulod sang Jaro plaza nga wala naman nagbatyag sang kabalaka sa seguridad kundi nabalaka sila kon paano makaginansya sa ila nga ginabaligya.
Naanad na sila nga ginahatagan sang ligwa nga makapabilin sa pagbaligya sa sulod sang masobra isa ka semana, kag ini bangud sa patakaran nga ginapatuman sadto pa man.
Luyag nila nga hatagan sila sang konsiderasyon nga makadugang pa sa ila benta agud nga mabawi nila ang ila ginabayad sa arkila sa pwesto nga ila ginahamtangan kag sa materyales nga ila ginpasad sa ila balaligyaan.
Maathag nga sa karon padayon ang ila pagpangunyadi nga makabenta sang dugang ukon makalabaw sa ila luyag nga bentahon kag makasiling nga maayo ang lakat sang ila negosyo.
Wala sang may nahimo ang syudad sa padayon nga pagpasaway sang mga nagapangunyadi sang kwarta.
Makul-aw ang kahiwatan bangud sa pagbinangigay sang mga punong barangay. Ginlamudan pa sang pulitika rason nga mas napan-os ang ila preparasyon. Matuod nga madali mahamo ang linuto kon madamo sang nagagalo. Kaangay ini sa sitwasyon sa kon paano dumalahan ang Jaro Agro-Industrial and Charity Fair.
Pila na ka punong barangay ang nagpungko agud nga magpanguna sa kahiwatan, apang lunsay kontrobersiya ang ila nga nadangatan kag tubtub sa karon wala sang maathag nga padugi kon ang ano ang dapat nga himuon. Sila ang lunsay nagasandig lamang sa kon ano ang naandan sadto pa man.
Posible nga ang mga nagadumala sa Jaro plaza sa tagsa ka piyesta ang kulang sa bendisyon sang patron apang bastante sa maldisyon.
Mabudlay tadlungon ang sayop nga nasuguran kon wala sang pagtinguha nga ini ang mabag-o kag ginapadayon lamang sang nagabulos.
Mas nagapangibabaw sa mga nagadumala kon paano sila makaganar sang daku gikan sa kita sang mga nagabayad nga mga stall, sa naga-operate sa feria kag rides, kag sa mga nagabaligya sang tanum.
Paano mo matadlong ang isa ka sitwasyon kon wala sang may maathag nga sistema nga ginapatuman?
Tion na nga magpasad ang city government sang husto kag angay nga patakaran kon paano lubos nga madumalahan ang plaza, kon paano makalikaw sa kontrobersiya, kag makalikaw sa mantsa sang pulitika.
Iplastar na ang angay nga padugi, sistema kag hilikuton. Dapat indi magduso-butong ang alkalde sa iya pahayag kag panindugan.
Sa tanan nga plaza, ang Jaro ang nagapanguna sa kontrobersiya bangud nagakamrusanay ang mga poderoso kag luyag magdominar sa pwesto.
Kuntani mag-abot ang panahon nga magbalik ang tanan sa pagpasulabi sa pangadi labaw sa pangunyadi./PN
