ATON ginadeklarar ang aton pag-upod kag pagsakdag sa pungsudnon nga protesta sang pumuluyo kag draybers sa isa ka transport strike kag people’s holiday. Ang ini nga paghulag isa ka pagrehistro sang aton pagpamatuk sa kontra-imol kag kontra-pumuluyo nga mga polisiya sa ekonomiya sang rehimeng Duterte.
Una diri ang programa nga modernisasyon, ang PUV phaseout ukon pagdula sang mga daan nga model sang jeepney, bus, van, taxi pati mga pumpboat kag traysikol sa diin nakasandig ang palangabuhian sang ginatos ka libo nga imol nga pumuluyo.
Wala kita nagakontra sa modernisasyon kon ang mga drayber, magagmay nga opereytor kag pumuluyo ang makaganar sini. Apang sa programa sang gobyerno, patyon sini ang magagmay nga opereytor bangud sang mahal nga balor sang jeep sa P2.4 – P3 milyones kada unit.
Ang promisa nga kooperatibisasyon ang palpak man bangud indi masarangan ang balor sang kada unit, mahal nga maintenance kag indi malab-ot ang profit-sharing nga P500 kada drayber kag opereytor kada adlaw.
Ang matuod-tuod nga modernisasyon amo nga kaptan sang gobyerno sang pagrehabilitar sang mga daan nga salakyan para mangin komportable kag makapamaayo sa kapalibutan. Indi nga isalig ini sa mga dalagkuan nga pribado nga kumpanya sa diin imbes nga serbisyo, negosyo ang ila opisyo.
Sa syudad sang Iloilo, ginpaboran pa sang konseho ang mga dalagko nga private bus companies kag negosyante paagi sa pagpahanugot nga magtukod sang transport hub sa Megaworld apesar may perimeter boundary ordinance. Ginhatagan man sang LTFRB sang bag-o nga prangkisa ang ini nga mga private bus companies para amat-amat mamonopolisa ang byahe halin sa syudad pakadto sa mga airports rason sang pagkaakig sang mga vans, taxi kag local bus draybers kag opereytors nga nadulaan sang pasahero.
Ang mga pumpboats nga nagabiyahe Guimaras-Iloilo kag vice versa ang target man dulaon sang MARINA kag Coast Guard diin madulaan sang palangabuhian ang masobra 500 ka mga pamilya sang tripulante, magagmay nga bolante sa pantalan, mga drayber kag kargador, kag magamahal man ang pletehan. Ang mga traysikol draybers ang indi na pagpasugtan nga magbyahe sa mga dalanon sang syudad kag kabanwahanan. Imbes nga buligan paano mapaayo ang serbisyo sa transportasyon, pribatisasyon kag pagpatay sa palangabuhian ang sabat sang gobyerno.
Ang aton mga mangunguma tuman man ang pagbakho sa manubo nga presyo sang palay sa P8-12 por kilo bangud sang Rice Liberalization Law sa diin wala-kutod ang pagsulod sang imported nga bugas sa aton merkado. Sa kaangay nga paniyempo sang nagligad tuig, P14-20/kilo pa ang presyuhanay sini. Ang promisa nga panubuon ang presyo sang bugas ang tuman man kalayo sa kamatuoran bangud masobra 90% sang supply ang kontrolado sang cartel kag dalagkuan nga rice traders.
Ang mga bolante sa kilid sang karsada wala man nakaluwas sa atake ni Duterte nga dulaon ang ila sensilyo na nga daan nga kita. Ginkakas sila nga daw mga hilamon lang nga wala gid ginpamensar sang gobyerno ang buwas-damlag sang ila pamilya. Wala na nga daan nagapatuhaw sang palamugnan ang gobyerno, ginadula kag ginapatay pa ang palangabuhian sang imol nga pumuluyo.
Gani aton irehistro ang aton tindog nga ibasura ang PUV phase out kag rice liberalization law. Aton idemanda ang alternatibo nga palangabuhian sang aton mga drayber, tripulante kag bolante.
Samtang padayon ang patyanay paagi sa tokhang kag militarisasyon sa mga kaumhan kag atake sa mga progresibo nga grupo, gina-amat-amat man kita patay paagi sa gutom kag kaimulon. – BAGONG ALYANSANG MAKABAYAN – PANAY <bayanpanay2014@gmail.com>
