ANG ngalan nga Jery Treñas nagalanog sa bug-os nga pungsod bangud sa maayo nga nahimo subong nga may COVID-19 pandemic.
Kaupod niya nga padayun nga nagasikat sanday Mayor Vico Sotto sang Pasig City, Mayor Isko Moreno sang Manila, kag Marikina City mayor Marcelino Teodoro. Madasig nga nakita ang ila hinimuan bangud sang ila aktibo nga social media teams. Madasig magpa-trending sa Twitter, Facebook kag Instagram.
May iban nga alkalde diri sa atun nga probinsya sang Iloilo nga maayo man ang hinimuan apang wala masyado nahatagan sang attention kay mahimo wala sang mabaskog nga social media teams, mahina sa PR ang ila tawo ukon indi lang mahilig sa publicity.
Halimbawa diri ang alkalde sa banwa sang Calinog nga si Mayor Francisco “Ico” Calvo. Sa umpisa madamo ang nagapakanubo sa iya ikasangkol. Apang nahibaluan nyo bala nga antes nagpatuman ang iban sang border restrictions, una na nga nagpatuman sini ang alkalde sang Calinog?
May hugot nga nagabantay sa tanan nga border sang banwa sa Capiz, Passi, Bingawan, Lambunao kag Dueñas. May iban nga nag-question sang iya ginapatuman nga pagsulondan, pero sa mga nakahangop, nagasakdag bangud para sa kaayuhan sang iya nasakupan.
Ang tanan nga nalista nga households santo sa survey nakabaton sang relief packs. May nagareklamo apang normal lang ina nga indi tanan matatapan apang ginahimakasan nga maalagaran.
Best practice man ang online baligyaan sa Calinog nga mahimo ka makapa-deliver sang imo gusto nga baklon.
Si Mayor Stephen Palmares sang Passi City dalayawon man ang ginahimo. Hugot ang pagpatuman sang inspection sa pagsulod sa ila syudad.
Panginbulahan man kay Mayor Jon Aying sang Sara. Sya ang nagpauna uso sang pagbakal sang mga utanon sang mga mangunguma agud ipanagtag sa ti-on sang ECQ. Ini gani ginsunod sang probinsya sang Iloilo.
Sa tanan nga mga alkalde sa probinsya sang Iloilo, ayhan pinasahe si Concepcion ,ayor Raul Banias. Posible kay doktor sya, nahibaluan nya ang dapat himuon. Sa masangkad niya nga ihibalo sa politika kag panghimanwa, naperpekto na niya ang lihok.
Panginbolahan man sa tanan nga alkalde sang Quinto Distrito sa pagbulig pahapos sang pagpangita sang sud-an sang iban nga alkalde sa tercer kag primier distrito.
Madamo pa nga mayors sang mga banwa ang maayo man ang ginahimo. Ining nasambit natun nga alkalde lang ang atun nalakip kay sila lang ang may nakita kita nga hulag sa social media. Ang iban mahimo mas maayo pa ang ila stratehiya.
Sa inyo nga wala namitlang, kita nagapanginbolahan man. (jpranco1975@gmail.com/PN)
