SA IKADUHA nga higayun nangin postibo sa dengue virus ang akun anak. Ang maayo lang kay ini timprano nga natukiban bangud nanungid sia dayun sa akun. Tuhay sa ikaduha ko nga anak nga sang mahibaluan ko may mga rashes na kag tuman na ka nubo ang platelet gani nakatsyhun kami sang apat ka bags sang dugo.
Indi man malipod nga tuman ka taas ang numero sang dengue cases sa probinsya sang Iloilo. Punu ang mga hospital gani ginhimo na nga extension ang mga health centers kag municipal gymnasiums agud matatapan lang ang nagataas nga numero sang pasyente.
Sa kakulang sang espasyo sa mga hospitals kag medical staff, nasaksihan ko kun ano ka budlay ang trabaho sang mga health personnel. Nagatrabaho sang extra nga oras kag ang ratio sang pasyente sa ila nagalalapaw na. Sa pihak sini may kapagsik pa sila gihapon kag makayuhum sa problemado nga mga pamilya sang pasyente.
Tuig 2016 sang nagtaas ang numero sang dengue…ina man nga tuig sang natapikan ang akun ikaduha nga anak.
Tuig 2019 nagtaas naman ang numero…kag ang akun ikatatlo nga anak naman ang natapikan sang dengue.
Liwat ko nga nasaksihan ang pagbatas sang mga medical staff sang Dr. Ricardo S. Provido Sr. Memorial District Hospital ukon mas kilala sa tawag nga Calinog District Hospital sa Barangay Dalid, Calinog. Apisar nga may extension na ang hospital, sa gihapon sa alley na lang kami sang akun anak nga gahigda sa folding bed. Kaangay sa iban man nga mga pasyente ginbatas namon ang mapaang nga sitwasyon bangud sa kadamuon sang tawo. Ang nagapamag-an lang sa sitwasyon amo ang mga mahangay nga pagsugilanon sang mga medical staff sa pasyente.Pagsugilanon nga may paghangop kag kabalaka.
Bangud sining akun mga naobserbahan, ayhan dapat na nga maghimo sang nagakaigo nga tikang ang atun mga local nga pamunuan sa pagsabat kun may pagtaas sang numero sang confinements sa mga hospitals indi lamang bangud sang dengue kundi bisan sa iban man nga klase sang balati-an.
Nahibaluan natun nga madamo sang ginbuhos nga pondo si anay gobernador Arthur Defensor Sr. sa mga hospitals apang kulang man gihapon. Sa nagataas nga numero sang populasyon kag kinahanglanon nga bed capacity sa mga hospitals, dapat gid nga magdugang sang pasilidad kag personnel ang gobyerno. Dapat ang ikaayong lawas mahatagan sang dako nga pagtamod kag kun sa hulubaton pa “Ang mapagros nga pumuluyo, nagapabakod sang pungsod.”
Panginbolahan sa mga nagatrabaho sa mga hospitals sang gobyerno. Salamat sa pagluwas sang kabuhi sang amon mga pinalangga nga himata. Salamat sa kahugod magserbisyo sa tawo bisan pa nga kulang ang sweldo.
Salamat sa mga mabinuligon nga staff sang hospital sa Calinog…sa mga nurses nga sanday Denmark Dalipe kag Mark Anthony Hurtada.. sa cashier nga si Miriam, salamat sa pagbasa sang akun column sa sini nga pahayagan…kanday Jocelyn kag Daphne sa Social Service kag sa mga doctors.
Kabay nga magkilitaay kita indi bangud nga naospital ang akun pamilya kundi sa mga lugar kag okasyon nga may kasadya./PN
nice one to