NAGPANGDAKOP lang gilayon ang iban nga local government unit nga wala nagbasa sang lubos sa kon ano ang kahulugan sang ginapatuman sa ila sang Department of Interior and Local Government.
Bangud sini, ang ila nasakupan nagbatyag sang pagsalangisag kag pagkatublag ilabi na ang mga drayber sang traysikol kag traysikad.
Sa masami, ginabasa lang ang sa ibabaw nga bahin sang memorandum circular kag wala ginaubos basa ang tanan nga detalye antes maghulag kag maghimo sang konklusyon.
Sa sini, kadamuan sa mga opisyales ang nagpaslaw kag natipaslong bangud madasig nga naghimo sang konklusyon.
Sadtong Oktubre 2, 2018, ginpanawagan na sang DILG sa tanan nga city kag municipal mayors nga dumilian ang mga pedicab kag tricycle sa national highways.
Ginpahayag ni DILG Secretary Eduardo Año nga para sa rason sang kaluwasan, ang traysikol ukon traysikad dumilian sa national highway nga ginagamit sang four-wheel vehicles nga labaw sa apat ka tonelada ang bug-at kag lagpas sa 40 kilometers per hour ang kadasigon.
Ginatagan man sang igtalupangod sang DILG nga ang traysikol kag traysikad nagahatag sang palangabuhian kag kita sa mga Filipino apang mabutang sila sa peligro kon tugutan sila sa mayor nga dalanon kag ang regulasyon sang ila pagtaris sa dalan ang para man sa ila kaayuhan.
Gin-athag sini nga mahimo tugutan sang gobyerno-lokal ang paglabay sa main highway kon wala na sang iban nga alternatibo nga ruta.
Sa katuyuan nga indi madulaan sang palangabuhian ang mga drayber sang traysikol kag traysikad, ginmandu sang DILG sa mga LGU ang pagpasad sang trike task force agud nga makadihon sang plano nga ruta sa ila nasakupan.
Madugay na nga ginadumilian ang pagtaris sa national highway apang naandan na bangud ginpabay-an sa malawig nga panahon, tubtub nga nangin normal na para sa tanan bisan pa nga peligroso sa dalan.
Ginaganyat man ang mga LGU nga dapat ilakip sa ila plano sa pagtukod sang mga lokal nga dalan ukon overpass ang mangin alagyan sang traysikol.
Ginapanugyan sang DILG nga ang tricycle route plan dapat lakipan sang pag-instolar sang angay nga signages, mga marka para sa linya nga agyan kag iban pa nga safety features agud giyahan ang mga salakyan, pagpahibalo sa bag-o nga ruta ukon porsyon sang highway kon sa diin tugutan ang mga traysikol bangud kulang sa alternatibo nga ruta, pagplastar sang color scheme ukon patimaan sa mga traysikol nga nagalabay sa national highway kag ang mga penalidad para sa nagalapas.
Ginapahanumdom gid ang mga LGU nga may yara na sang kasuguan sadto pa apang wala lang gintalupangod nga ipatuman kaangay sang Republic Act 4136 ukon ang Land Transportation and Traffic Code, mga DILG directives sadto nga ginalakipan sang DILG Memorandum Circulars 2007-11, 2011-68 kag 2020-004 nga gin-isyu na nga nagadumili sa presensya sang traysikol kag traysikad sa national roads kag ang pagsaad sa mangin operating conditions kag franchising sang mga traysikol.
Angay nga dakpon ang mga kolorum, ang wala sang rehistro kag ang mga drayber nga nagamaneho nga wala sang lisensya.
Maathag sa direktiba sang DILG nga wala sang dapat may madulaan sang palangabuhian. Obligasyon sang LGU nga pangitaan sang angay nga alagyan ukon ruta ang mga traysikol kag traysikad agud nga indi sila mabutang sa peligro sa luyo sang dalagku kag nagahagunos nga mga salakyan ukon trak.
Ginapangapinan sang DILG ang mga traysikol kag traysikad paagi sa pag-obligar sa mga LGU nga tumanon ang ila katungdanan. (bertladera@gmail.com/PN)
