NAG-UMPISA na ang pag-test para sa COVID-19 sa Western Visayas Medical Center sa distrito sang Mandurriao agud nga masapar ang nagadamo nga patients under investigation sa rehiyon.
Mismo si Dr. Mary Jane Juanico nga tagpamuno sang Infectious Disease Section sang Department of Health (DOH) Region 6 ang nagsiling nga sadtong Martes pa, Marso 24, nag-umpisa ang pag-operate sang COVID-19 testing center.
Nahibaluan nga may duha ka medical technologist gikan sa Research Institute for Tropical Medicine (RITM) ang nag-abot sa Iloilo City sang damlag lang.
Ginpahayag man ni Dr. Marlyn Convocar ang regional director sang DOH-6 nga may masobra 500 ka testing kits ang WVMC sa karon kag ila hatagan sang prayoridad ang mga pasyente nga under investigation nga may severe cases, immune-compromised kag iban pa nga vulnerable sectors.
Natukiban lang ang pagpanikasog ni 1st District congresswoman Janette Garin sang may nagpalapad sang ila papel kag nagreklamo nga nagpang-“hijack” siya kuno sang eroplano kag wala nakasakay ang iban nga persona.
Natalakay na, naathagan na kag nakamasmas na ang luyag magpangguba sa ngalan sang mga nagahimakas nga mapangapinan ang Western Visayas sa pat-ud nga krisis tuga sang COVID-19.
Ipahigad naton ang isyu sang pulitika. Kahibalo na sila kon sin-o ang credit-grabber kag kon sin-o ang luyag maglupad nga kuyos ang pakpak.
Diri natukiban ang likom nga pagpangita sang solusyon ni Garin paagi sa pagpakig-angot sa DOH, RITM, kag pila pa ka mga opisyal sang gobyerno kon paano kita makapasad sang laboratoryo nga gilayon nga maka-operate para sa test sang COVID-19.
Nagpanghulam sang pribado nga eroplano kag nagpangayo sang clearance sa Civil Aviation Authority of the Philippines kag Office of the President agud matigayon ang tanan.
Sa laktod nga sugilanon, sa pihak sang malisya, pagmusing sa ngalan, kag pagpatig-agaw sa kadungganan, natigayon ang plano nga tuman ka daku ang mahatag nga benepisyo sa mga pumuluyo.
Gilayon nga nagsapol ang mga nagadumala sa mga ospital, DOH kag local government unit kon paano makahimo sang kasugtanan, proseso, kag pagsulundan sa sini nga katuyuan.
Natumod nga COVID-19 dedicated hospital ang Western Visayas Medical Center, maga-ayuda ang West Visayas State University Medical Center, kag Western Visayas Sanitarium kag kabuylog man ang mga pribado nga ospital.
Lauman naton ang pagdamo sang numero sang positibo sa COVID-19 samtang nagapadayon ang testing. Kon madamo ang ma-test, posible madamo man ang ma-capture nga kaso.
Kaangay ini sang pagpangisda sa lawod, nagatantyar kon sa diin may mga isda apang sa bulig sang lambat nga ihabyog sa dagat, may posibilidad nga may yara gid sang mahulik sa tagsa ka batakon na ang lambat.
Katulad sini diri ang kaimportante sang testing. Kinahanglan nga matumod kon may nagpositibo kag agud nga makahimo sang angay nga tikang kon paano mapunggan ang padayon nga paglapta sang virus.
Sa pagtinguha ni Cong. Janette Garin, mas mapahapos ang paghiwat sang testing bangud dira na lang sa aton mismo kag indi na kinahanglan nga papilahon ang specimen didto sa RITM kag maghulat sang pila ka adlaw antes mahibaluan ang resulta.
Daku ang bulig sang mga LGU nga nagahimakas nga makabakal sang testing kits agud nga may magamit kag pat-ud nga mapangapinan ang mga pumuluyo nga yara sa ila listahan sang patients under investigation.
Sa pagbinuligay sang tanan wala sang krisis nga indi naton malampuwasan, kag sa husto nga pagpanikasog, wala sang may mauyang nga kusog kaangay sa ginhimo ni 1st District congresswoman Janette Garin kag sa pagbuylog sang tanan nga local chief executives kag mga ospital. (bertladera@gmail.com/PN)
