[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
NI ROBERTO ‘BERT’ LADERA
[/av_heading]
[av_textblock size=” font_color=” color=”]
MISTERYO
Ginakabig sang kadamuan nga isa ka kadalag-an ang pagpapas kay Richard Prevendido. Halos wala sang nagapamalabag sa kon ano ang natabu sa iya magluwas sa iya mga himata nga nagabatyag sang tuman nga kasubo.
Nagadayaw ang mga Ilonggo sa kahugod kag kaisog sang aton kapulisan nga matapna kag mapintukan na ang pagdata sang ilegal nga droga sa Kabisay-an Nakatungdan, ilabi na sa syudad kag probinsya sang Iloilo.
Nakita sang tanan nga kon hungdon sang kapulisan, wala sang kriminal nga makapalagyo ukon makalikaw nga indi magbayad sa kasugoan.
Sa kon ano man nga paagi sila napukan, wala na gina-id-id pa sang kadamuan bangod nga ang Ilonggo nagakumporme na sa sitwasyon, luyag naton nga mapapas ang kalautan ilabi na ang may daku na nga natuga nga kahalitan.
Nagaupod ako sa panan-awan nga dapat ang malaut manabat sa kasugian kag ang aton kapulisan dapat dayawon sa ila kahugod kag kalawig sang pasensya tubtob nga malab-ot ang ila target.
Bangod nga wala na naton gina-id-id ang mga bagay, ang tanan ginakabig na naton nga normal, natural kag wala sang dapat dudahan kon ano man ang ginhimo sang kapulisan. Importante sa aton nga nakita naton nga nagahuray-ad ang aton dugay na nga ginahandom nga papason.
Apang, sa kapin isa na ka semana, padayun nga nagatuhaw ang mga palamangkutanon nga ang maiwat, makilas, kag madanlog nga si Richard Prevendido ang natigayon nga makwa sang kapulisan sang tuman ka tawhay.
Mataas ang pader, mabudlay taklason kag nagbatu ang target. Apang, pila lang ka lupok ang nabatian. Mabudlay nga taklason kag kon magtaklas ka indi ka ayhan pagsugataon sang bala? Kon nagbatu ang target, ngaa pila ka lupok lang ang iya nga nabuy-an? May yara sang mataas nga kalibre sang armas, apang nangin dekorasyon lang sa iya luyo?
Sin-o ang nagtransaksyon sa tag-iya sang balay nga ila gin-arkilahan? Paano nabal-an nga may kaangay sila nga balay nga malayo sa kadamuan kag maligwin kon padulongan? Sin-o ang iya kahimbon nga naggiya sa iya agud dira maghukmong?
Ang tagsa bala ka lupok sang pusil nangin wala sang wasi bangud nga halos tanan sa lawas nila nagtupa ang bala? Wala bala sang mantsa ang mga dingding nga makasiling nga nagahalok ang bala sa pader matapos makagwa sa kanyon sang ila pusil?
Ano kadugay ang pagkatabu antes nahibaluan nga natigayon na ang tanan? Wala bala sang dapat paminsaron nga tuhay sa kon ano ang natabu sa mga gamit sa palibot? Ano ayhan ang unod sang mga laptop? May mga sensitibo bala nga bagay nga dapat ilikom sa publiko?
May nagsiling nga sa malayo ginhiwat ang operasyon kag dira lang ginhumlad ang tanan nga sitwasyon, apang ini tanan ang indi na naton matungkad magluwas lamang kon ang kamatuuran ang magabuad-ad kag magahayag agud sa pumuluyo makahatag sang paathag.
Pila lamang ini sa mga palamangkutanon sang iban nga indi mabungat bangod nakandadihan sa pagkumporme sa sitwasyon.
Ang kamatayon ni Richard Prevendido, para sa iban nga indi kumbinsido, magapabilin nga isa ka misteryo./PB
[/av_textblock]
[/av_one_full]
