[av_textblock size=” font_color=” color=” av-desktop-hide=” av-medium-hide=” av-small-hide=” av-mini-hide=” av-medium-font-size=” av-small-font-size=” av-mini-font-size=”]
[/av_textblock]
[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”]
Ni Roberto ‘Bert’ Ladera
[/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
BAKUNA SANG KABALAKA
Makabulungol ang kamatuoran, nagadaguob sa tagsa ka dulunggan.
Nabutang sa makatalagam nga sitwasyon ang programa sa pagpabakuna sang gobyerno sang Pilipinas sa tagsa ka bulan sang Agusto.
Mahimu nga makatuga sang kahadlok sa mga ginikanan ang nagkatabu karon nga kontrobersiya nga ginadalahigan sang bakuna para sa dengue nga Dengvaxia.
Kon ginakabig sang karon nga administrasyon nga ginlimbungan sang Sanofi Pasteur ang gobyerno, wala ayhan nagtuon ang nagligad nga administrasyon kon paano halongan ang ikaayong lawas sang kapin sa 830,000 ka mga kabataan?
Ano ang pinakamotibo kon ngaa nagpadasu-daso sila sa pagbakal sang bakuna nga wala gani ginagamit sang taghimu sa ila kaugalingon nga lugar?
Magluwas sa isyu sang korapsyon, sa kon pila kag kon sin-o ang nakaganar sang daku sa sini nga transaksyon, ginatukib man kon matuod nga gingamit ang pagbakuna sa mga lugar nga may pinakadamo nga botante.
Madamo na sang politiko nga nadutlan kag napenahan angut sa korapsyon nga ginadalahigan. Nagabayad na ang iban sa ila sa mga kalautan nga ila ginhimu samtang nagapangalagad sa banwa. Sila kag ang ila kaugalingon lang ang nagaabaga sa resulta sang ila malaut nga kahimuan.
Apang sa bahin sang kontobersiya sa pagbakal sang Dengvaxia, indi lang kaban ang nahul-ab kundi nabutang pa sa peligro ang kabuhi sang inosente nga mga kabataan.
Maathag nga may yara sang disbentaha sa natigayon nga transaksyon sa bahin sang gobyerno bangod nga ang barato nga bakuna ang ginbakal sang aton gobyerno sa tuman ka mahal nga balor.
Maathag nga may yara sang nagpadihot agud nga maglaktod sa proseso agud mangin madasig ang pagpatigayon nga matapos ang transaksyon.
Maathag man para sa tanan nga dapat may yara sang manabat sa sini nga kontrobersiya kag bisan may yara na sang natumod ang tanan apang dapat nga ipaagi sa proseso kag pamatian ang bahin sang mga ginadudahan.
Wala sila ginadalokan sang espasyo sa idalom sang proseso, sa idalom sang demokrasya nga pagdumalahan, dapat sila nga magpaathag kon paano natigayon ang tanan kag kon ano kadaku sang risgo ang ila ginhimu para sa bwas-damlag sang mga inosente nga nabakunahan sang Dengvaxia.
Nagapamati lang ang pumuluyo, nagapamatyag sa kon ano ang mahimu nga matabu. Ginahulat nila ang mga paathag kon ano ang posible matabu sa ila mga kabataan nga nabakunahan.
Nagabantay man ang Department of Education sa mga nabakunahan kon ano ang ila sitwasyon sa karon, kon may tuhay sila nga nabatyagan ukon may mga patimaan sang indi maayo nga epekto nga natuga ang bakuna sa ila lawas.
Kontani indi magbatyag sang kahangawa ang mga ginikanan tuhoy sa programa sang pagpakuna sang gobyerno, kontani indi mapagkit sa ila pinsar kag dughan ang ini nga hitabu kag ang nagakabit diri nga kontrobersiya.
Mapapriso ang mga sutil kag sa ulihi makagwa sa karsel, apang ang kabuhi nga mauyang ang indi na mabalikan.
Sadto naayawan ang gobyerno nga magkumbinser sa tawo agud nga magpasakop sa programa sang pagbakuna bangod sa ila kahangawa.
Sa karon, gobyerno na ang naghatag sa ila sang bakuna sang kabalaka./PB
[/av_textblock]
[/av_one_full]
