[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”]
Ni Roberto ‘Bert’ Ladera
[/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
NAGLUMPAT KAG NAGKAPA-KAPA
Madamo ang nagalungo-lungo sa matigdas nga panindugan ni Mayor Jose Espinosa III sa pagpulpog sini sang iya matig-a nga kamot sa lamesa sang mga katapo sang Metro Iloilo Water District (MIWD) Board.
Natingala ang tanan kon ngaa sadtong mainit nga ginatalakay ang isyu angut sa franchise renewal sang Panay Electric Company (PECO), halos magbungat sang iya baba kag magluad sang iya panindugan ang akalde kon sa diin kahibalo ang tanan nga ang isa sa nagatindog nga abogado sang PECO amo man lang ang law firm sang kongresista sang syudad kag bilas sang alkalde.
Ayhan bangod sa kakusog sang boltahe rason nga sa isyu sang PECO nagkisi-kisi ang alkalde?
Apang ngaa sa isyu sa MIWD daw kaangay sang mabakud nga pader ang iya tinaga, mabudlay nga rumpagon kag nagapabug-at sa ila naga-ilig nga mga plano.
Ginalantaw ni Atty. Roy Villa, ang legal officer sang MIWD, nga wala sang otoridad ang alkalde sa pagpasilabot sa operasyon sang MIWD kag ang ginhatag lang sa iya nga gahum sa idalom sang Presidential Decree 198 ukon Provincial Water Utilities Act amo ang pag-appoint sa mga katapo sang board.
Gikan sa lugar kag tion nga wala ginalauman, hinali nga nagtuhaw ang pahayag sang alkalde nga ginatapos na niya ang termino sang karon nga mga katapo sang MIWD board kag gin-inisister nga sia ang may otoridad sa pag-appoint kag indi ang gobernador sang probinsya sang Iloilo kag dapat nga kakason sila kag iya nga islan sang mga bag-o.
Ginmando man sini sa MIWD nga indi pagdayunon ang iya 12.4 billion pesos nga joint venture agreement sa Metro Pacific Investments Corporation nga isa ka pribado nga water distribution company.
Apisar sang mando ni Mayor Espinosa, gindayon sang MIWD ang pag-aprubar sang ila kasugtanan nga nagasiling may yara sila sang otonomiya kag wala sang labot ang appointing authority sa ila operasyon.
Maathag nga ginapasilabtan ni Espinosa ang operasyon sang MIWD nga indi sia ang nag-appoint sa mga katapo sang board.
Ginapahanumdom man ni Atty. Villa si Mayor Espinosa nga ang Presidential Decree 198 wala nagahatag sa appointing authority sang gahum sa pagdeterminar sa bakante sa water district, kag ang appointment matabu lang kon may yara sang bakante.
Gina-insister ni Atty. Villa nga balido ang pag-appoint ni Governor Arthur Defensor Sr. sang karon nga MIWD board of directors nga may yara sang tag-anum ka tuig nga termino nga ang chairman amo si Dr. Teodoro Robles, kag mga katapo nga sanday Atty. Juanito Acanto, Dr. Jessica Salas, Ramon Cua-Locsin, kag Atty. Josephine Abad-Caram.
Magatakop ang termino ni Abad-Caram sa Disyembre 2018, samtang ang termino nanday Robles kag Cua-Locsin ang magatakop sa 2020 kag sa 2022 naman sanday Acanto kag Salas.
Maathag nga sa sini nga sitwasyon naglumpat sa tubig si Mayor Espinosa, wala niya ginhibalo kon madalom ukon madabaw, wala sia nagpanagadsad kon tunukon, kon batuhon, kon damo sisi, ukon malunang ang iya pagalumpatan.
Kag sang yara na sia nagalunoy kay nabasa na sang tubig, sia ang nagpangayo sang bulig samtang nagakapa-kapa.
[/av_textblock]
[/av_one_full]
