[av_textblock size=” font_color=” color=” av-desktop-hide=” av-medium-hide=” av-small-hide=” av-mini-hide=” av-medium-font-size=” av-small-font-size=” av-mini-font-size=”]
[/av_textblock]
[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”]
Ni Roberto ‘Bert’ Ladera PASUNGAN
[/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
Nagasaulog kita sang Paskwa sa tunga sang panahon sang teknolohiya. Sa panahon nga mas mahapos magpadala sang mensahe, maghapos magpakig-angut, mahapos magpalab-ot sang aton pagtamyaw sa tagsa-tagsa.
Makita naton ang pagsaulog sang Paskwa paagi sa paghiwat sang pagtililipon nga may manamit nga mga pagkaon, may makahulubog nga ilimon, may nagatumpok nga mga regalo kag pagkinasadya sang mga nagatambong.
Yari kita sa panahon sang Paskwa kon makita na naton ang naga-igpat-igpat nga mga suga sa mga panimalay ukon sa mga dekorasyon sa mga establisimiento. Mga patimaan sang pagdumdom sang Paskwa nga ginahulat sang tanan.
Bisan ano pa ka garboso, bisan ano pa ka bastante, bisan ano pa ka dagaya sang pamaskwa apang sa gihapon aton ginalantaw ang Belen. Makita naton ang mag-iloy nga nagatamod sa lapsag nga si Hesus sa isa ka simple nga lugar, wala sang kon ano man nga patimaan sang kadagaya sa materyal nga bagay.
Liwat kita nga ginapahanumdom sang sini nga Paskwa sa kon ano ang kahulugan sang aton kabuhi, sang aton pagpangabuhi, kag kon ano nga sahi sang kabuhi ang aton ipangabuhi.
Nabun-ag ang Manunubos sa pasungan, indi bangod nga sa sadtong panahon nga kulang pa sa pasilidad, kundi sa pagpasimbolo nga dapat simple, mapainubuson kag wala sang bugal ang pagpangabuhi.
Ginapahanumdom kita nga dapat hilway kita sa mga materyal nga bagay nga amo ang nagaganoy sa aton nga magpalayo sa matuod nga kahulugan sang aton nga kabuhi. Ginapahapos sang teknolohiya ang aton nga pagpatigayon sang hilikuton apang ginapahapaw sini ang aton nga balatyagon.
Nagapasimbolo ang pasungan nga wala sang malahalon nga bagay sa palibot kundi ang aton kabuhi nga nag-ulhot sa sini nga kalibutan, bugay gikan sa tagtuga nga nga dapat gid naton nga pasalamatan.
Matuod nga ang kabuhi isa ka kompetisyon, ang tanana nagahimakas, nagatinguha kag nagapaindis-indis nga makalabaw sa isig-kapareho apang dapat sa pamaagi nga indi makahalit kag indi makapigos bangud ang tanan may patas nga kahigayunan.
Ginapatudok sang pasungan sa aton pang-ino-ino nga magaabot kita sa kalibutan nga wala sang dala, magakabuhi nga wala sang bitbiton kag magabiya nga wala sang pagabalunon.
Nagasimbolo ini nga kita lunsay mga umalagi sa sini nga kalibutan, nagapanglakaton lamang kita sa sini nga kabuhi kag bilang mga nagalabay dapat aton nga sagamsamon ang kanami sang aton nga pagpanglakaton, maghangaw-hangaw, kag mag-apresyar sang kaanyag sang yara sa palibot nga gintuga sang Makaaku.
Ginapahangop sa aton sang pasungan nga wala kita sang may ginapanag-iyahan sa sini nga kalibutan.
Kapareho sang iban nga gintuga sang Diyos, kaangay sang mga sapat, sang mga tanom kag iban pa, ang tanan ginhatagan sang hamili nga kabuhi nga dapat amligan kag ang pagggawi sa sini nga kalibutan dapat nasandig sa kaayuhan kag kaalwan.
Ang pasungan isa ka simple nga duog apang mabudlay mahangpan kon ano ang iya kahulugan, kon ano ang simbolismo, rason nga ginabaewala, rason nga ginatalikdan sang iban.
Labaw sa mga malahalon nga bagay, labaw sa magakalanyat nga mga materyal, dapat ipabilin naton nga buhi sa aton paminsaron kag balatyagon ang kahulugan sang pasungan./PB
[/av_textblock]
[/av_one_full]
