[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”]
Ni Roberto ‘Bert’ Ladera
[/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
PAGSUG-ALAW SA BAG-ONG TUIG
Madamo sang mga handumanan nga mabilin sa magabiya nga tuig, madamo man sang handumanan nga mahimu matabu sa palaabuton nga tuig.
Sa masami, madamo sang impluwensya ang sahi sang aton pagsug-alaw, may yara sang nakahanda nga mga prutas nga bilog nga ginatipon sa ibabaw sang lamesa, mga prutas nga dapat matam-is kag dapat kaki bilang pasimbolo sang kwarta.
Ind man madula ang mga pasirit kag mga palupok nga ang katuyoan amo nga tabugon ang malain nga elemento ukon ang dimalas sa aton kabuhi kag paupdon sa magabiya nga tuig agud nga maakomodar naton ang mas maayo nga kapalaran sa nagasunod nga tuig.
Matuod nga madamo sang mga panimad-on, madamo sang mga pagpati, madamo sang namat-an nga mga hilikuton nga ginabuhat apisar nga kon kaisa indi naton mahangpan ang mga rason kon ngaa, indi naton mahangpan kon ano ang nangin epekto sa iya katuyoan apang wala kita sang may makita nga rason agud ini ang supakon ukon ligwaton.
Hangpon natin nga wala sang kingki nga indi maubusan sang gaas, wala sang suga nga indi mapundir, wala sang kandila nga indi maupod basta ginagamit sa paghatag sang kasanag.
Kaangay sang uling sa kalan nga nagaugdaw ang init matapos ang iya pagsingkal, nagatahaw kag nangin abo.
Duna man sa tawo ang magpangita sang bag-o nga lugar, bag-o nga gawi, bag-o nga eksperyensya samtang ginadumdom ang mga nakalipas na kag diri niya ginasandig ang mangin bag-o nga hilikuton nga dapat mangin tuhay sa iya na nga naandan.
Indi madula ang paghanda sang pagkaon sa lamesa, dapat mangin dagaya agud mangin bastante man ang pagsulod sang tuig nga wala ginakulang sa pagkaon kag indi magutom.
Ginapuno man ang talagbasan sang bugas agud nga indi mawad-an sang bugas sa bug-os nga tuig kag bisan pa ang mga suludlan sang tubig ang ginapuno man. Wala man ginakalipatan nga pasigahon ang tanan nga suga agud mangin masanag ang palaabuton, ginabuksan ang bintana kag pwertahan agud nga matalunsay ang pagsulod sang swerte.
Madamo kita sang mga pagpati, madamo kita sang ginahimu nga mga pamaagi agud nga maagom naton ang dagaya nga pagsulod sang bag-o nga tuig. Mataas ang aton paglaum, matayog ang aton nga handum.
Apang aton bala nahuna-huna kon ano ang madulot sag sini nga mga panimad-on kag mga hilikuton sa aton kabuhi?
Natimbang bala naton nga mas importante ang maghimakas agud malab-ot naton ang dagaya nga palaabuton? Nakapangayo bala kita sang hamili nga bulig sa makaaku nga amo ang may kontrol sang tanan, nga amo ang salandigan sang tanan, kag amo ang nakahibalo sang aton palaabuton?
Ano man nga sahi sang aton pagsaulog, ano man nga sahi sang pagpati may ara kita sa pagsug-alaw sang bag-ong tuig, dapat naton ihalad ang aton nakalipas kag aton palaabuton sa mas gamhanan nga nagatamod sa aton.
Labaw sa ano man nga mga preparasyon kag mga kasadyahan nga aton ginhanda, dapat naton nga ipasulabi ang pagpasalamat nga aton malampuwasan ang ini nga tuig kag buhi kita nga saksi sa pagsug-alaw sa bag-ong tuig./PB
[/av_textblock]
[/av_one_full]
