[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”]
Ni Roberto ‘Bert’ Ladera
[/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
MANTSA SA PANGHIMANWA
Masakit pamatian kon ang aton lugar ginamulay sang iban paagi sa pagbansag nga indi naton mauyonan.
Kaangay ini sa pagtawag ni Presidente Rodrigo Duterte sa Iloilo bilang “most shabulized” kag “bedrock of illegal drugs” nga sa karon amat-amat na nga nagtahaw kag nangin kabahin na lang sang mga dulumdumon sa kabuhi.
Madamo sang mga bugal ang natandog, may nagpahayag sang matunog angut sa ila indi pagkumporme sa pahayag sang presidente kag may mga maalam nga nagalantaw sa kuno epekto sini sa ekonomiya kag dignidad sang syudad.
Ang ila mga haum-haum ang lunsay napaslawan bangod nga ang ila ginakabalak-an ang wala natuman. Mas pa nga nagdamo ang nagpadulong nga turista sa Iloilo apisar sa mga pagbansag sang pangulo. Mas nagatin-ad ang ekononiya bangod mas nagdamo ang mga negosyante nga nagsulod. Kag ang mga nagakahangawa ang sa karon naalimunaw, nadula. Ang ila ginalantaw nga hitabu sa ila karon nag-igu, sila ang naglinong, kag sa kahuya sila ang daw masalop.
Nagalipas ang panahon kag ang mga paghusgar ang ginatakus sang tinion, ginapatukal ang gabok nga putos kag ginahumlad kon ano ang matuod.
Kunsabagay, ang tanan nga politiko nga mapamatbatan ukon madutlan sang kaso nga ila ginapangatubang ang magasinggit nga sila ang ginapolitika. Indi na bag-o ang ini nga klase sang argumento. Indi na bag-o ang ini nga pagdepensa sang mga politiko.
Apang ang asud-asud nga dismissal order batok kay anay Mayor Jed Patrick Mabilog ang maathag nga pahayag sang nakomiter nga kasaypanan samtang nagapangalagad sa syudad. Una sia nga naigu sa indi sini mapaathag nga manggad kag ikaduha diri, sang sini lang, ang tuhoy sa maanomaliya nga towing deal angut sa clamping ordinance.
Nagasiling ang iban nga may nagasunod pa kag madamo pa. Nagakahulugan nga ang pagsayop indi lang isa kundi madamo pa.
Ginsundan ini sang 90 ka adlaw nga suspension order nga ginpapanaog sang Sandiganbayan batok kay Congressman Jerry Treñas kag ang reklamo ginpasaka man sang Ombudsman angut sa nabaton sini nga pondo gikan sa PDAF fund ni Senador Loren Legarda nga 500 mil pesos.
Madamo sang asud-asud nga hitabu ang nagluntad kag nagatublag sa liderato sang syudad. Kahapon may balita nga nagtuhaw nga nagsaad sang pinal ang Commission on Audit nga ang former kag incumbent Iloilo City officials, lakip ang congressman kag ang karon nga alkalde ang dapat manabat kag dapat ibalik ang 46 million pesos nga ila nabaton gikan sa Productivity Enhancement Incentive ukon PEI sang tuig 2009.
Ginapasuni nga nangin kabahin sa kwestyonable nga pagpanagtag sang PEI sa city personnel sanday Mabilog, Treñas, kag 21 ka iban pa nga former kag incumbent city officials.
Ginpirmahan ni COA chairman Michael Aguinaldo kag Commissioner Isabel Agito ang desisyon samtang nag-inhibit naman si Commissioner Jose Fabia.
Sa nagakahinabu, maathag nga ang garok kon magsungaw makatublag, nagahatag sang kaluod sa mga makasimhot. Matuod nga yara sa ulihi ang paghinulsol sang mga nahubog sa poder kag manggad kag sa mga naputos ang ila kalag sang bugal.
Maathag na kon sin-o ang nagatuga sang mantsa sa panghimanwa./PB
[/av_textblock]
[/av_one_full]
