[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | Antique napahamtang bangud sa pahampang’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=’custom’ color=”]
Monday, April 24, 2017
[/av_textblock]
[av_textblock size=” font_color=” color=”]
Nangin masaku ang probinsya sang Antique bangud sa ginahiwat nga 2017 Palarong Pambansa.
Gindugukan, ginpadulungan, ginkakunyagan ang ini nga hitabu nga nagapadayon tubtub sa karon. Daku ang nabulig sa sini nga pahampang sa pagpat-in sa mapa sang Pilipinas kag agud matalupangdan ang maanyag nga probinsya.
Sa ika-60 nga paghiwat sang Palarong Pambansa, naagom gid man sang Antique ang kahigayunan nga mangin host kag mapakita ang ila pinasahi nga kinaiya sa pag-abi-abi sa mga bisita.
Ginrisguhan ni Governor Rhodora Cadiao ang pag-host sang pinakadaku nga pahampang sa bug-os nga pungsod sa bulig sang mga Antiqueño kag sang pila ka mga opisyales sang banwa. Nagbuylog man ang mga gobernador sa mga katupad nga probinsya agud mapasiguro ang madinalag-on nga pagpatigayon sini.
Nahibaluan nga sa kapin 60 ka tuig na ang nakaligad, kag sa 12 lang ka probinsya nga masami naga-host sang sini nga pahampang, natigayon gid man nga marumpag ang kinaandan nga tradisyon kag nauyatan sang Antique ang renda sa pagdumala sang 2017 Palarong Pambansa.
Indi lamang pahampang ang ila ginakasakuan bangud namutikan man ang hinali nga pagdamo sang mga turista nga nagabisita sa ila probinsya. Natalupangdan man nga bisan ang mga lugar nga sadto maiwat ang pagpadulong sang mga bisita, sa karon nagasinumbali na lamang sila sa paglantaw sa manami nga mga lugar.
Makabig nga isa ka tinago nga manggad ang probinsya sang Antique. Madugay nga tinion nga wala matalupangdan, wala nabukaran ang iya naga-inggat nga kaanyag, ang iya manaya-naya nga mga lalantawon, ang iya matin-aw nga tubig-dagat kag ang pagkama-abi-abihon sang mga Antiqueño.
Samtang nagahilapit ang paghiwat sang Palarong Pambansa, masami na nga ginabalita ang probinsya sang Antique. Masami na nga naghatagan sang atensyon. Ang wala nakakadto sadto, nakabatyag sang kasorpresa sa pinasahi nga lugar, kag labaw sa tanan sila ang nagadayaw sa ikasangkol sang probinsya nga mag-host sang sini nga pahampang.
Kadungan sang pagdugok sang mga bisita sa mga manami nila nga tourist destination, wala man untat ang ila preparasyon. Apisar sang mga kabudlay sa pamaagi sa pagpadulong sa ila lugar, apang nagpangita sila sang medyos nga makatan-ay sang alternatibo kag mapasiguro nga indi mabudlayan ang magakadto sa ila probinsya.
Ginapasalamatan sang mga Antiqueño ang paghatag sa ila sang pagsalig nga maka-host sang 2017 Palarong Pambansa bangud sa sini nga higayon sila ang nabalikdan, natalupangdan, kag nangin destinasyon sang kadamuan.
Nagpagsik ang ekonomiya sang Antique, nagsaku ang paghatag sang serbisyo sa mga bisita, nabuhi ang maluya nga lakat sang transportasyon. Nabatyagan sang Antiqueño ang pinasahi nga sitwasyon kon paano sila dugukan sang mga kasubong nga Filipino gikan sa iban nga probinsya.
Nahatagan sang higayon ang Antique nga mapakita ang ila mga produkto, pinasahi nga kinaiya, maanyag nga mga lugar, kag ang malabaab nga pag-abi-abi sa mga bisita.
Nagapabilin na sa pang-ino-ino sang tanan ang probinsya sang Antique. Matalupangdan na sang gobyerno-nasyunal kag mahatagan sang dugang nga imprastruktura kag serbisyo nga madugay na nila nga ginahulat.
Makasiling ang tanan nga ang Antique ang napahamtang bangud sa pahampang./PB
[/av_textblock]
[/av_one_full]
