[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | LATAY SANG KURYENTE’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
Ni ROBERTO ‘BERT’ LADERA
[/av_heading]
[av_textblock size=” font_color=’custom’ color=”]
Wednesday, April 19, 2017
[/av_textblock]
[av_textblock size=” font_color=” color=”]
Madamo sang pamaagi agud nga mahibaluan kon bala ang kable ginalatayan sang kuryente, apang ang makatakus sang boltahe amo ang ginagamit nga instrumento sang mga eksperto nga amo ang tester nga nagasiling kon pila ang amperahe kag boltahe sang nagalatay nga kuryente.
Nabuksan ang interes sang mga konsumidor sang ginduso ni Councilor Joshua Alim ang ‘meter card reading system’ nga nagatuyo nga maamligan ang interes sang konsumidor batok sa kabus kag lapaw nga sukot sang balayran sa kuryente. Kabus bangud nga may nagabayad sang kulang sa dapat kag kinaandan nila nga konsumo sa kuryente, lapaw bangud nga ang ila balayran tuman ka daku kaysa sa kinaandan nila nga ginabayaran sa tagsa ka bulan nga konsumo sa kuryente.
Nangin mainit ang pagtalakay sa ginhiwat nga committee hearing, nagtuhaw ang mga bagay nga lipod sa ihibalo sang kadamuan, nagsanga ang mga ideya nga nagpadabdab sa nagasiga nga panulok sang mga tumalambong.
Nakutkutan ang madugay na nga kapaltahan sang Panay Electric Company Incorporated. Madamo sang mga bagay nga dapat tadlungon. Madamo sang mga bagay nga dapat athagon. Lunsay nagakinahanglan ini sang matul-id nga imbestigasyon.
Ginpangabay sa konseho nga pa-imbestigaran sa kongreso ang kahimtangan sang PECO. Ang kongreso lang ang angay nga makahimo sang imbestigasyon bangud yara sa ila poder kag diri nakasandig ang liwat nga pag-agom sang PECO sang ila nga prangkisa.
Liwat nga ginbalay ang resolusyon agud nga mahingyo ang kongreso paagi sa tatlo ka tiglawas nga amo ang ginpangabay nga magdala sang kawsa sang mga konsumidor sa syudad sang Iloilo.
Nalakip sa ginhingyo nga magbitbit sang kawsa sang pumuluyo sanday Bayan Muna Partylist Representative Carlos Isagani Zarate, Akbayan Parylist Representative Harry Roque kag Iloilo City Lone District Congressman Jerry Treñas.
Nakalab-ot sa mga natungdan ang hingyo sang konseho. Wala na nakalikaw pa si Treñas kag gilayon nga iya gin-aku nga ang ila law firm amo ang abogado sang PECO.
Masanag pa sa butlak sang adlaw nga indi madepensahan sang kongresista ang interes sang iya pumuluyo bangud nga ila ginadampigan ang interes sang PECO.
Apisar nga wala siya nagapamalabag sa pagahimuon nga imbestigasyon, apang wala siya sang may mahimo agud nga mapangapinan ang interes sang pumuluyo paagi sa pagsupak sa katungdanan sang ila law firm nga dampigan ang PECO.
Matuod gid man nga indi mabunit ang isda sa iya ikog, kundi mismo sa iya nga baba. Matuod gid man nga ang tanan makilala kon mahukas na ang ila alukaba, kon magwa na sila sa ila nga panit kag kon maglantad na sila bangud sa sugo sang sirkumstansya.
Madugay na ang problema sa PECO apang wala sang may nangisog nga bukaron ang pinanid sang ila kapaltahan.
Madugay naman nga nagakatulog ang dapat nga magpangapin sa mga konsumidor. Madugay na nga bulag ang dapat nga magagiya sa iya mga pumuluyo. Malapad ang pinanid sang papel nga kwarta nga sarang makalikop sa nagamurarat nga mga mata.
Nagkurog ang unod, nagbugtaw gikan sa katulugon, nagsanag ang panulukan kag nakamarasmas sa kamatuuran bangud sa latay sang kuryente./PB
[/av_textblock]
[/av_one_full]
