[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | LIBAGON’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
NI ROBERTO ‘BERT’ LADERA
[/av_heading]
[av_textblock size=” font_color=’custom’ color=”]
Friday, April 7, 2017
[/av_textblock]
[av_image src=’http://www.panaynews.net/wp-content/uploads/2017/04/Panugdaon-pic.jpg’ attachment=’102504′ attachment_size=’full’ align=’center’ styling=” hover=” link=” target=” caption=” font_size=” appearance=” overlay_opacity=’0.4′ overlay_color=’#000000′ overlay_text_color=’#ffffff’ animation=’no-animation’][/av_image]
[av_textblock size=” font_color=” color=”]
Makapila ka beses na nga ginlawag ni Presidente Rodrigo Roa Duterte ang pangalan ni Iloilo City Mayor Jed Patrick Mabilog nga naangot sa ilegal nga druga.
Madamo na ang nakabati, madamo na ang nagpalamungol, madamo ang naling-an sa masami kag pila ka sulit nga paghinambit sa iya nga ngalan.
Masakit sa una nga pagpamati, nagbatyag ang kadamuan, nagsupak ang balatyagon kag paminsaron kag ang natungdan daw marumpag sa iya nahamtangan. Sang dalayon na, ang tanan naanad na kag nagtuhay ang panan-awan nga ang pagsambit dapat nga pakigbatuan paagi sa paghimo sang mga bagay nga makapanas sa sayop nga panulok.
Nagbungat ang PDEA-6 sang sini lang paagi sa ila Assistant Regional Director nga si Levi Ortiz nga wala sa ila listahan ang pangalan sang alkalde. Ginsiling sini nga wala sang ebidensya nga maangot ang alkalde sa ilegal nga druga.
Ginpahayag ni Ortiz nga wala sang bastante nga basehan nga matumod nga may kaantanan si Mabilog sa illegal drug trade. Madamo pa sang pahayag si Ortiz nga nagalimpyo sa ngalan ni Mabilog, nagapanas sa pagpangduha-duha, kag nagahatag kay Mabilog sang bag-o nga paglaum sa iya pagpanghimanwa.
Bangud sini, ginakabig ni Mabilog nga nagabot na ang masakit, dalitan, kag may sarait nga tunok nga madugay na nga sa iya unod nagadulot, nga nagatuga sang kasakit sa iya pang-ino-ino kag balatyagon, nga madugay na niya ginaagunto, nga sa karon makabatyag na siya sang alibyo.
Apang, kaangay sa konsyerto nga may naglisa nga tono, nagtingala ang Malakanyang angot sa sini nga pahayag sang PDEA-6.
Wala sang hinalung-ong ang Malakanyang sa ginpagwa nga pahayag sang PDEA-6 angot sa kahimtangan ni Mabilog. Wala pa nakalab-ot sa ila ang nasambit nga impormasyon kag wala pa sang opisyal nga komunikasyon nga nakalab-ot sa ugsaran sang Malakanyang nga limpyo na sa kaangtanan sa ilegal nga druga si Mabilog.
Nagakadapat bala nga PDEA-6 ang magpagwa sang pahayag sa kon ano ang kahimtangan ni Mabilog sa ila listahan? Angay bala nga ang PDEA-6 dapat una nga magpahibalo sa ila Central Office sa resulta sang ila pinakaulihi nga imbestigasyon kag ang Central Office magapahibalo sa Office of the President kag agud sila ang magpagwa sang pahayag?
Nakahangop bala si Ortiz sa kon ang dapat nga buhaton antes magpagwa sang pahayag nga supak sa ginasambit ni Presidente Rodrigo Duterte? Ano ayhan ang rason ni Ortiz sa padasu-daso nga pagpagwa sang impormasyon? Luyag lang bala ni Ortiz nga mahatagan sang alimbyo ang alkalde agud nga mapakalma ang iya panimuot kag balatyagon?
Ngaa nagapatig-agaw kag naglumpat una sa paghatag sang pahayag si Ortiz nga limpyuhan si Mabilog kag wala niya gintugyan ini nga ibungat sang Malakanyang?
Ang ginhimo bala ni Ortiz makahatag sang bulig kay Mabilog ukon mas makapakomplikar sa iya kahimtangan? Bulig bala ini batak ukon bulig lasak?
Dapat nga magtuon kag ibutang ni Ortiz ang iya kaugalingon sa husto nga lugar kag dapat makahibalo magpamati sang ambahanon agud nga sa tion nga siya mag-amba indi na siya mangin libagon./PB
[/av_textblock]
[/av_one_full]
