[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | NAGADALHAY NGA SALAKYAN’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
Ni ROBERTO ‘BERT’ LADERA
[/av_heading]
[av_textblock size=” font_color=” color=”]
Wednesday, June 14, 2017
[/av_textblock]
[av_textblock size=” font_color=” color=”]
Kadungan sang pag-uswag sang syudad, ang mga salakyan nagamuad. Mas madamo pa ang pribado nga salakyan kaysa sa mga pampubliko kag maathag ini nga nakita sadtong ginhiwat ang duha ka adlaw nga untat-biyahe.
Madamo na sang kasuguan ang napasad, madamo na sang ordinansa ang nabilin sa tabtaban kag nalipatan nga ipatuman. Madamo naman sang mga bag-o nga ordinansa nga sang ginpatuman daw kaangay sang piyesta nga ginadugukan, ginabantayan, kag gina-obserbahan kon paano ipatuman.
Kahibalo kita kon ano ka dugay ang pagsakay sa jeep gikan sa imo ginhalinan padulong sa imo pakadtuan, indi ini bangud sa naga-igod nga jeep kundi bangud sa naga-igod nga trapiko.
Nadugangan pa ang aton paghinay bangud sa ginapatuman nga speed limit ordinance.
Apang sa tunga sini nga palaligban nga ginaagunto sang tanan, isa ka manami nga balita ang naglanog sang damlag lang. Nagpalab-ot sang interes ang isa ka kompaniya sang Chinese nga magapahamtang sang monorail sa Syudad sang Iloilo.
Apisar nga wala pa sang tul-id nga detalye ang ini nga intensyon, apang nagahatag na ini sang masanag nga paglaum sa tanan.
Ginalantaw naton nga mangin solusyon ini sa naga-igod nga lakat sang trapiko, sang tuman ka gutok nga karsada, kag sang kabalaka sa tuman ka itom nga asu nga ginabuga sang tambutso sang mga salakyan.
Manami kuntani nga matigayon agud nga mas mapalip-ot ang tion sang pagbiyahe, madali nga makalab-ot sa padulungan, kag madamo pa sang mga bagay nga mahimo sa mga tinion nga gina-uyang sa pagpungko sa salakyan padulong sa malayo nga kaladtuan.
Indi naman angay nga sundon pa naton ang ruta sang riles sang tren bangud nga tuman na ka gasto ang paglimpyo sa sini nga banas. Madamo sang mga naga-istar sa riles kag madamo sang matublag kon sila ang pagsayluhon agud lamang nga liwat nga makita ang banas sang riles.
Mas angay nga tun-an kon sa diin ini dapat ipahamtang. Maathag nga sa ibabaw ini malabay kag sa riles nga ginatib-ong sang dalagku nga mga haligi.
Tion na nga may kaangay kita sang sini nga sahi sang transportasyon. Mangin mas madali ang aton transaksyon, mas madali ang aton pagbiyahe, mas bentaha para sa tanan nga nagabiyahe sa tagsa ka tion.
Dapat mas mangin madasig na ang aton transportasyon agud nga makadungan sa kadasig sang aton pagtin-ad.
Aton ginasigahum nga matigayon ang ini nga proyekto kag kuntani mangin kasarangan man ang balayran sa plete sang sini nga sahi sang salakyan.
Dapat ihatag sang syudad kag probinsya ang angay nga matan-ay sa sini nga investor agud nga maganyat sa pagpatuman sang ila proyekto. Kahibalo kita nga ang aton lokal nga pamunuan wala sang ikasarang sa pagtukod sang sining tuman ka mahal nga proyekto.
Sa subong pa lang dapat na nga istoryahan sang lokal nga pamunuan kon ano ang maathag nga katuyuan sang investor, indi na sila pagbuy-an kag ihigot na ang ila intensyon sa maayo nga pag-atipan.
Tion na nga mapadasig naton ang sahi sang aton mga transportasyon kag manami lantawon nga nagadalhay ang salakyan./PB
[/av_textblock]
[/av_one_full]
