[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | SA ILIG SANG BUSAY’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
Ni ROBERTO ‘BERT’ LADERA
[/av_heading]
[av_textblock size=” font_color=’custom’ color=”]
Thursday, April 13, 2017
[/av_textblock]
[av_textblock size=” font_color=” color=”]
Matin-aw nga tubig, mabugnaw nga naga-ilig gikan sa ibabaw sang bukid kag nagadaludo sa matig-a kag pino apang dalagku nga bato ang una nga nakaganyat sa amon panulukan.
Makita sa idalom ang mga dalagku pa gid nga bato kon sa diin nagapanglubaybay ang ilig sang tubig. Sa sentro sang ginatup-an sang tubig, madalom kag halos daw isa ka layon sang kawayan kon salumon, apang sa kilid sini may yara sang matungtungan nga bato kag diri nagalunoy ang kadamuan nga nagapaligo.
Sa idalom nga bahin sang gina-iligan sang tubig, mahimo didto magsalud sang imo ulo kag bug-os nga lawas, mabatyagan mo ang nagadaganas kag tuman ka kusog nga ilig sang tubig.
Naagom ko ang pinakamanami nga masahe sa akon likod tuga sang ilig sang tubig nga makusog, takus ang akon pagpadulong didto bangud may duna nga manugmasahe sa makapoy nga biyahe.
Angay nga padulungan ang Nadsadjan Falls, ang lugar nga isa ka bugay sang kahitaasan. Dapat ka man nga magpadulong kag mag-ambit sa pinasahi nga bugay para sa mga tawo. Dapat mo nga kadtuan agud nga imo ma-eksperyensyahan ang obra-maestra nga kaanyag sining busay sa Igbaras, Iloilo.
Madamo sang pasaka kag panaog nga banas nga maagyan, may bahin nga dapat ka maglusong sa suba, nga manabaw lang karon, kag liwat nga magtaklad sa nagatakilid nga bato. Dapat nga maayo ang imo panimbang kag nagakubot ang imo dapa-dapa agud nga indi ka makadalin-as.
Mabugnaw ang pagpanglakaton bangud sa nagalikop nga handong sang mataas nga bukid sa palibot kag mga tanum kag puno sang kahoy. Gina-usoy mo ang banas nga lunsay dalagku nga bato ang imo masumalang, samtang naga-ilig ang matin-aw nga tubig.
Kanami lang magbalik sa sabak sang kabukiran, gina-agubayan ikaw sang iya pag-amlig, mainit ikaw nga ginaagda agud nga mabugnawan ka sa iya pag-amuma, agud nga mapanas ang imo kahidlaw sa iya kag mangin komportable ka sa luyo niya..
Nahamtang ang Igbaras sa nabagatnan-nakatundan nga bahin sang Iloilo. Kapin ini sa 40 kilometros ukon 25 milyas gikan sa Syudad sang Iloilo.
Gikan sa kombinasyon sang duha ka tinaga ang ngalan nga Igbaras, ini amo ang “ig” ukon “tig” nga nagakahulugan nga “madamo sang” ukon “season of,” kag baras nga nagakahulugan sang balas ukon “sand.” Ang Igbaras nagakahulugan nga “madamo sang balas.”
Nagataas sang kapin sa 100 metros ang Nadsadjan Falls, naga-ilig ang tubig gikan sa ibabaw kag nagatupa sa daw kawa nga palaliguan. Sa imo pagtangla, makita mo ang gina-iligan sini nga bato, tuman ka tig-a, kag may mga puno sang kahoy nga nagatungtong sa ibabaw lakip ang pila ka mga tanum nga nagakapot sa bato.
Nagsugod ang tanan sang nagpang-agda si SB Member Vincent Endoma Robles sang Igbaras, Iloilo nga amo man ang chairman sang Committee on Tourism sang nasambit nga banwa. Ginhaylo niya kami nga magpadulong sa Nadsadjan Falls nga nahamtang sa Barangay Passi.
Agud nga mas makaagom sang dugang nga ihibalo, magpakig-angot sa Tourism Office sang Igbaras sa telepono numero 518-4022, local 104, ukon kay SB Member Vincent Endoma Robles sa cellphone number 0906-1798-429.
Sa tion sang imo pagpamalandong subong nga Cuaresma, dapat didto ka magpadulong, angay mo nga angkunon ang kalinong paagi sa pagpahulom sa tubig gikan sa ilig sang busay./PB
[/av_textblock]
[/av_one_full]
