KON may “action plan” nga iduso agud ipahilayo ang mga kabataan sa droga, isa na dira ang pagpasanyog sang programa nga nagahatag sing trabaho sa ila, labi na gid ang out-of-school youth.
Kon may trabaho sila, segurado mapahilayo na naton ina sila sa kalye sa diin madamo nga kalainan ang ila matun-an kag himuon.
Sa karon (2018), sa estimate sang International Labor Organization, may 6.76 porsyento nga mga kabataan (16-24 sing pang-edaron) nga Filipino ang wala sing trabaho.
Indi gid man daku ini kon tan-awon naton sa figura, apang kon ang kalabanan nga apektado amo ang mga out-of-school youth daku ini nga problema.
Ang 6.76 percent sang 100 ka milyon nga Filipino mga anum tubtub pito ka milyon na nga mga kabataan naton ina. Kon katunga lang (mga tatlo ukon apat ka milyon) sa ila ang out-of-school youth, sus mga 200,000 na nga pasaway ina sa kada isa sang aton 18 ka rehiyon.
Pwede man seguro ma-reduce ta ining unemployment sang aton mga kabataan sa 3.90 percent nga yara sa Kazakhstan, 5.30 percent sa Japan, 6.30 percent sa Thailand, kag 6.30 percent sa Hong Kong.
Seguro naman may mahimo ang aton mga Public Employment Service Office (PESO) parti sa sining problema.
***
LIBRE ARTIPISYAL NGA KAMOT
Ginagamit naton ang aton mga kamot sa madamo lang nga trabaho, halin sa pinakasimple nga hilikuton tubtub sa pinaka-mauti kag pina-kabudlay.
Kon bisan isa lang nga kamot ang wala, daku na gani ini nga kakulangan para sa isa ka tawo sa iya panghulag kag pagpatigayon sang madamo nga hilikuton, labi na gid sa pagpauswag sang iya pangabuhian para sa kaugalingon kag pamilya.
In fact, mangin lain man ang pagtan-aw sang iban nga tawo sa iya. Nadula ni Molly Higgins ang tuo niya nga kamot halin mismo sa pagkabun-ag niya. Tungod sini, masami gina-bully siya tungod sang ining iya kakulangan. Gani, daku gid ang iya kalipay sang ginkaluy-an siya sang isa ka foundation nga naghatag sa iya sang artipisyal nga kamot. Sugod sadto nangin mabakod na ang iya kumpyansya sa kaugalingon.
Kamo nga mga kumpol diri sa siyudad sang Iloilo may kahigayunan man nga makaangkon sang artipisyal nga kamot, nga kon tawgon prosthetic hand.
Ang upisina ni Vice Mayor Jeffrey Ganzon nagahatag sining kahigayunan agud makaangkon kamo sini nga magamit sal-i sa natural ninyo nga kamot nga nadula.
Ginpahibalo sang sini lang ni Gg. Ramon Sia, nga isa ka staff ni Vice Mayor kag incoming JCI Iloilo president, nga may kasubong nga free hand project ang LN-4 Foundation sang California, U.S.A.
Ang interesado sa sini nga libre nga prosthetic hand, pwede ka pa-rehistro sa upisina ni Vice Mayor tubtub sa Setyembre 30 sang sini nga tuig.
May ginatigana subong nga mga 50 ka prosthetic hand sa idalom sang sining proyekto, nga ilunsar sa palaabuton nga Oktubre 5. Fist-come, first-served ini, gani indi na magpadugay kag magpa-rehistro sa sining helping hand nga proyekto sa upisina ni Vice Mayor Ganzon.
Ang requsito lang, sunu kay Gg. Sia, amo nga ang beneficiario may edad nga pito ka tuig paibabaw, ang kumpol mga 10-12 ka centimeters (mga 4-5 ka pulgada) halin sa siko (elbow), kag retrato sang beneficiario.
Kon may dugang pa nga interesado, makapadugang pa ang LN-R Foundation sang mga 100 ka prosthetic hand sa Enero sang madason nga tuig.
Ang LN-4 Foundation nakapatigayon na sang sining ila “humanitarian” nga proyekto sa mga 80 ka pungsod sa kalibutan. (w_mateojr@yahoo.com/PN)
