PWEDE ayhan nga hatagan sang igtalupangod sang city government nga panginpuslan ang malaba naton nga esplanade agud nga mangin venue sa pagsaulog sang paskwa sa syudad sang Iloilo?
Sa masami, ang kadamuan sa aton nagakadto sa mga mall agud nga maglagaw, magkaon kag magpamalaklon. Kinaandan ini nga ginahimo naton sa panahon sang paskwa. Tingob nga nagasaulog ang bug-os nga pamilya. Mas masadya kon damo kag nagasaulog sang tingob.
Madamo man ang nagakadto sa mga restaurant kag tingob nga nagapanyapon ukon sa mga hotel nga may malapad nga venue para sa mga aktibidades may kahilabtanan sa pagsaulog sang Christmas party.
Tungod sini, ang pagdugok sang mga tawo sa mall kag iban pa nga establisemyento komersyal nagatuga sang pag-igod sang mga salakyan ukon gutok nga trapiko. Malaba ang pila sang pribado kag pampubliko nga salakyan sa mga dalan padulong sa sini nga mga lugar.
Nakita ko nga tungod ginakabig sang kadamuan nga nagbalik na sa normal ang pagsinarayo. Madamo sang nahidlaw nga magsaulog sang paskwa sa gwa sang ila panimalay tungod nga nag-agwanta kita sa sulod sang duha ka tuig bangud sa pandemya. Luyag sang kadamuan nga maghangaw-hangaw naman sa iban nga lugar ukon magsaulog luwas sa sulod sang panimalay.
Napinsaran ko nga dapat siguro matun-an naton kon paano panginpuslan ang malaba nga esplanade kag diri maghiwat sang simple nga pagtililipon, simple nga pagpanyapon, simple nga pagsaulog sang okasyon.
Agud nga malapta ang tawo kag indi magdugok sa isa lang ukon pila lang ka lugar kag agud mapatahaw ang guot sang trapiko. Agud nga indi magkonsentrar ang direksyon sang pumuluyo sa mga mall ukon sa mga hotel kag restaurant.
Agud mangin tuhay naman ang lugar, tuhay nga eksperyensya kag tuhay nga sitwasyon ang mabatyagan sang pumuluyo.
Posible nga tugutan lang sa sini nga okasyon ang mga kiosko, dapat rehistrado kag may permiso, may regulasyon para sa pagpabilin sang katinlo kag iplastar ang lugar agud mangin malinong kag matawhay.
Kanami ayhan batyagon ang paskwa sa luyo sang suba? Ano ayhan ang mangin balatyagon kon nagasaulog nga tingob sa indi kinaandan nga lugar? Mas mabugnaw ayhan ang huyop sang hangin? Mas manamit ayhan ang pagpanginaon kag pagsugilanon?
Malaba ang aton esplanade. Ginalauman nga magadugok ang mga tawo sa kon diin ang mas malapit sa ila. May yara sang para sa bahin sang Mandurriao, sa bahin sang Molo, sa bahin sang La Paz kag sa bahin sang City Proper. Apang, angay gid anay nga tun-an ang ini nga ideya agud nga mapuslan ang esplanade sa panahon sang paskwa kag ma-promote ang esplanade bilang alternatibo nga doog para sa mga pinasahi nga okasyon.
Tion na nga iduso naton bilang atraksyon ang esplanade, indi lamang bangud sa iya kaanyag, kundi paagi pa gid sa iban nga bagay nga mahimo naton mapanginpuslan ukon ma-ideyahan agud nga mas mapalapit kag maganyat ang tawo nga magpadulong diri.
Mahatagan man sang higayon ang mga magagmay nga negsyante kag makatan-ay sang trabaho ang pagpahamtang sang temporaryo nga kiosko.
Napinsaran ko lamang ini tungod luyag ko nga mahatagan sang solusyon ang problema sa gutok nga trapiko, ang mas barato nga pagsaulog sang paskwa, ang pagtuga sang bag-o nga lugar nga pagadugukan, ang tuhay nga palibot sa pagsaulog sang paskwa, ang pagdugang sang atraksyon sa syudad, ang pagtuga sang termporaryo nga negosyo kag trabahao kag agud nga mas maapresyar sang tawo nga may pinasahi nga lugar nga ginatawag nga ‘esplanade’ nga pwede mangin venue sa mga espesyal nga okasyon kaangay sang paskwa.
Nagalaum ako nga may grupo nga magapanday sa sin inga ideya, makakita sang mas maathag nga katuyuan sini na plano kag mahatagan sang katumanan ang ini nga pinasahi nga ideya.
Mas mabugnaw magpanglakaton sa esplanade sa tion sang kasisidmon, Mas maka-relax ang tawo kon magpungko sa luyo sang suba. Ginapakalma sini ang aton paminsaron kag lawas, kaangay ini sang bulong, natural ang pagpaayo sa aton.
Nanugon ako sa esplanade nga matapos nagbantog, karon daw ginakalimtan na tungod mas naga-agaw sang atensyon ang mga aktibidades sa mga mall kag iban pa nga establisemyento-komersyal. Madamo sila sang ginapaminsar kon paano maganoy ang tawo pasulod sa ila lugar.
Dapat may kangay man kita sini nga paminsaron kon paano mahatagan sang tuhay nga kahulugan ang esensya sang esplanade kag kon paano magamit ini agud diri makasaulog sang mga okasyon.
Tion na nga aton paminsaron kon paano saulugon ang Paskwa sa Esplanade. (bertladera@gmail.com/PN)
