NAKITA mo na bala ang imo kaugalingon nga nagapanglakaton sa doog nga kaangay sang boulevard ukon esplanade nga nagalantaw sa isla sang Guimaras?
Luyag mo bala nga makita ang pagbutlak sang adlaw nga nagatungkaaw sa likod sang bukid sang Guimaras? Luyag mo bala nga madapyahan sang preska nga hangin sang kasisidmon samtang nagapungko ukon nagahambilay man sa esplanade ukon boulevard nga nagatamwa sa isla sang Guimaras?
Ginasigahum ko nga magaabot ang adlaw nga matigayon ang ini nga handom nga mahatagan sang katumanan ang pagpahamtang sang boulevard ukon esplanade man sa kilid sang baybay sa coastal barangay sang distrito sang La Paz kag sang Jaro.
Kaangay sa mga nauna nga plano sadto nga ginatuyo nga hawanan ang panghigaron sang baybay sa bahin sang city proper padulong sa Molo kag sa Arevalo agud nga hatagan man sang katumanan ang handom nga patahumon ang nasambit nga lugar.
Una na nga gin-anunsyo nga sayluhon ang mga pumuluyo, i-relocate sa iban nga lugar sang syudad agud nga madula na ang illegal settlers kag matinluan ang lugar kag mapatahum.
Apang kon lantawon, mabudlay ini himuon bangud madamo ang nagapuyo kag tuman ka daku ang pagagastuhon sang gobyerno agud matuman ang plano. Mahimo man nga makusog ang pagpamalabag sang mga residente nga indi makabiya sa lugar bangud sa rason sang ila palangabuhian.
Ang mas maaathag, mahapos kag wala sang sablag nga alternatibo sa sini nga plano amo ang coastal area sang La Paz kag Jaro nga nagaatubang sa isla sang Guimaras.
Mas masangkad ang wayang, ilisipon ang nagapuyo nga residente malapit sa baybay kag mas angay nga pahamtangan sang sini nga plano.
Dapat konsiderahon ini sang city government kag sa mga nagatuyo sa sini nga plano. Kaangay sa boulevard sang Dumaguete City kag didto man sa Cebu, mas makagalanyat ang lugar kag makabig nga alternatibo sa natukod na nga mga kaladtuan sang mga tawo.
Malaba ang lugar kag yara sa luyo sang dagat, wala sang kahangawa sa mabaskog nga balud bangud nga nalipdan sang Guimaras kag bagay nga pahamtangan sang mga kalan-an nga nagatan-ay sang mga sea foods kag Ilonggo delicacies.
Indi lamang para lagawan kag hangaw-hangawan, mahimo man ini nga mangin malinong nga parke para sa bonding moment sang maghimata. Pahamtangan sang kalan-an kag mga duna nga baligya, mga souvenir items kag native delicacies.
Kaangay sa sitwasyon sa mall of asia, ang natumod ko nga plano ang magasibu gid ilabi na kon magtindog ang megamall kag ang isa ka mataas nga hotel sa bahin sang Balabago, Jaro.
Mas labaw pa sa iban ang lugar bangud may bird sanctuary sa distrito sang La Paz nga mas mahatagan sang atensyon sang mga mahuyugon sa pispis kag mas masuportahan sang gobyerno kon may maganar paagi sa mga nagapadulong nga mga bisita.
Kuntani malakip ini sa plano nga “level up” para sa syudad sang Iloilo ni Congressman kag Mayor-elect Jerry Treñas.
Nagalaum kita nga paagi sa mas masanag kag masangkag nga panan-awan sang bag-o kag liwat nga napilian nga alkalde, matigayon nga patahumon ang kilid sang baybay. (bertladera@gmail.com/PN)
