[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAUTWAS! ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY JOEL FRANCO
[/av_heading]
[av_textblock size=” font_color=” color=”]
Mahipuson nga matarong
ANG magahod nga tubig, manabaw apang ang makanay nga tubig, madalum.
Ang ido nga palataghol mahinadlukon, ang nagahipos maisog.
Ini nga mga hulubaton masami natun mabati-an sa atun mga katigulangan sa ti-on nga may mabati-an kita nga tawo nga palasugid kag palatikal.
Sa ti-on nga malapnagon na ang paggamit sang internet kag ang social media, amo na ang mas nagahari sa pagpalapnag sang impormasyon. Madamo kita sang makita nga mga nagapa-alam-alam sa mga isyu kag maisog magduso sang punto nga wala sa lugar.
Kun magbasa kita sang mga posts sa Facebook kag iban pa nga social media, indi na mahibaluan kun ano ang matu-od kag palapaw. Ang kabutigan kag matarong indi na mapain. Maisog pa mag-post ang mga tawo nga wala sang punto kundi ang magpang-bully kag magpakahuya sa iban nga tawo. Sa baylo nga mag-post sang mga bagay nga maka-edukar, mas ginapili pa ang mga katuntuhan kag kabuangan.
Sa panahon nga mainit ang politika sa pungsod dala sang kaisog sang mga pahayag ni President Rodrigo Duterte, mas labi nga nagabinahin-bahin ang mga Filipino. Ang mga sumalakdag ni Duterte kag ang mga nagapamatok sa iya mas nagataas ang pader nga nagaupang sa ila tunga. Mas nagabakod ang dingding sa tunga sang magtimbang nga bahin. Bangud sini diri nabun-ag ang madamo nga mga personalidad sa social media agud depensahan ang ila tagsa ka panindugan.
Kun pamati-an naton ang kampo ni Duterte, matarong ang iya mga pagpamuyayaw kag ang katuyuan nga magbulag sa Estados Unidos, European Union kag iban pa nga mga international organizations. Maisog nga ginatabug sang presidente ang US, EU kag iban pa nga magbiya sa pungsod kay indi man magutuman ang Pilipinas. Posible ginabase ni Duterte ang ginhimo sang China nga nangin protectionist nga sa malawig nga tinuig, nagpangabuhi nga wala sang ginasandigan nga iban nga pungsod. Indi kita China nga masanyog na ang mga industriya (ugaling ang China subong naga-antos naman sang tuman nga polusyon).
Ini nga panindugan sang pamunuan ni Duterte ginabali naman sang mga kontra. Sa sini nga pagkontra ilabi na kun naka-post sa social media, magabunga sang mainit nga debate kag gyera nga sa masami ang mga may matarong nga panindugan nagapahigad na lamang kag pabay-an ang mga trolls nga magpabutyag sang punto nga wala sa tono.
Amo ini ang problema sa Pilipinas. Madamo sang mga matarong apang mas ginapili nga maghipos sa mga isyu apisar nga kinahanglanon ang ila punto. Ini na kuntani ang panahon nga manindugan sila agud mahatagan sang kasanagan ang mga isyu.
Ugaling ang problema naman kay madamo ang sarado na ang paminsaron kag wala na nagapamati sang punto. Kun sa hulubaton pa, “Ang baboy, hatagan mo man sang diamante, lasakon lamang nila ini.”
Ang punto bisan ano pa ka matarong ang panindugan, sala ini para sa kadam-an./PN
[/av_textblock]
[/av_one_full]
