[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAUTWAS ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY JOEL FRANCO
[/av_heading]
[av_textblock size=” font_color=” color=”]
Positibo nga epekto sang Duterte presidency
KINAANDAN na nga kritisismo lang gikan sa media ang makita, mabasahan kag mabati-an adlaw-adlaw. Labi nga nagabaton sang kritisismo amo ang ginahaum-haum nga kaso sang pagpamatay nga wala sang hustisya nga bunga sang maduguo nga gyera kontra illegal nga droga.
Nga-a bala amo ini ang makita, mabati-an kag mabasahan? Ini bangud nga diri man nga aspeto sang panggobyerno nakasentro ang administrasyon ni Pangulong Rodrigo Duterte. Sa una nga isa kagatos kaadlaw sa palangakuan, lunsay lang away kontra droga ang aton nasumalang. Halos wala na nahatagan sang bahin sa mga mensahe sang Presidente ang ekonomiya, trabaho, edukasyon, ikaayong-lawas, kag iban pa.
Sa pihak sini, may mga bagay nga kun ako ang pahambalon, dalayawon ang pamunuan ni Duterte. Ini amo ang pagtubo sang disiplina sa mga tawo, sa gobyerno ka man, pribado nga empliyado ukon ordinaryo nga Filipino.
Disiplina — ini ang dako nga kakulangan sa Pilipinas. Gikan sa simple nga pagtuman sang kinaandan na nga pagbinatasan tubtob sa dalagko nga mga kasuguan, balingag gid ang kadam-an. Apang sang nagpungko na si Duterte sa Malacañang kag ginpaandaman ang mga balingag sang utok sa gobyerno, nagkambyo ang tanan.
Bisan ang mga ordinary nga tawo nagtuon na sa pagtuman sang pagsulondan (apisar indi man tanan). Sa sini nga aspeto sang pagpamuno nakita ko nga nagmadilanag-on si Duterte. Ini bangud ginapakita niya ang matuod nga halimbawa (minus lang sang iya pagpamuyayaw) paagi sa pagpangabuhi sang simple.
Sa isa ka documentary sang ika-100 days sang Duterte administration nakita nga sang ti-on na sang panyapon, nagpila man sya agud magkuha sang pagkaon sa buffet table. Ginapakita sang President ang iya pagkasimple nga tawo bisan pa sya na ang pinakamataas nga lider sang pungsod. Ang kaangay nga pagbinatasan isa sa may dako nga bug-at sa paminsaron sang mga Filipino nga madali nila masunod bangud isa ka positibo nga halimbawa.
Mabatyagan na karon ang pagbag-o sang pagbinatasan sang mga ahensya sang gobyerno kun may transaction ang kliyente. Ini bala bunga sang matuod nga pagbag-o ukon bangud lang sang kahadlok kay President Duterte?
Sugod sang gintukod ang 8888 complaint desk, halos ang tanan nagahalong na. Ang tanan nga ahensya sang gobyerno ginhatagan tatlo ka adlaw agud aktuhan ang mga transactions sa mga opisina sang gobyerno.
Diri sa syudad sang Iloilo may ara na sang customer care center nga nagabaton sang problema kag reklamo batok sa mga indi mayo nga pagbinatasan kag mahinay nga serbisyo sang mga opisina sang syudad. Mabatyagan na ang madasig kag mahangay nga pagtatap sang mga empliyado sa mga may transaksyon sa gobyerno. Ini dako nga positibo nga pagbag-o.
Ang mga dako nga pagbag-o sang pagbinatasan sang mga tawo nagahatag sa akun sang kalipay bangud na batyagan ko nga bisan paano, may pagbag-o ang mga Filipino. Halos tanan maisog na manindugan sa mga isyu kag magbungat sang mga problema sa ila lugar.
Ang gusto ko lang ipanawagan nga indi man magpinatarasak ang mga supporters sang President sa ila pagpang-bully sa iban nga nagakontra sa mga ginahimo ukon ginapanghambal sang President. Kuntani ligwaton man sang mga Duterte supporters ang ila pagbinatasan bangud gusto nila nga bag-uhon ang sosyodad.
Nalipay kita sang pagbag-o sa mga opisina sang gobyerno pero nagakasubo kita sa nagalala nga pagbinatasan sang mga sumalakdag sang Duterte administration. Samtang nagasinggit sila sang pagbag-o, nagbag-o man bala ang inyo pagbinatasan?
Sundon ta si President Duterte sa matarong niya nga mga programa apang sabdungon ta ang iya indi maayo nga baba kag aktwasyon.
Suportahan ta ang President sa maayo apang pukawon ta ang iya atensyon sa iya mga kapaltahan. Tingub kita sa pagbag-o para sa kaayuhan sang kadam-an./PN
[/av_textblock]
[/av_one_full]
