[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAUTWAS! ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY JOEL FRANCO
[/av_heading]
[av_textblock size=” font_color=” color=”]
Makatalagam nga gobyerno!
INDI MAKALIPAS ang isa ka adlaw nga may madakpan nga pusher ukon user sang ilegal nga droga. Indi magnubo sa average nga tatlo ang nagakadakpan nga ara sa baligya-anay sang ilegal nga droga.
Ano ayhan ang kabangdanan nga-a wala nagakahubas ang pusher kag user sang ilegal nga droga?
Madata gid man bala ang ilegal nga droga sa pungsod kag nabuyagyag lang ini bangud sang mas tampad kag mahugod nga kampanya kontra diri?
Ukon base padayun nga may buslot ang kasuguan, amo na nga maisog ang mga durogista nga magpadayun sang ila hilikuton sa pihak sang mapintas nga pamaagi sang administrasyon sa pag-ayam sa ila?
Kadamo sang mga palamangkutanon nga masabat lamang sang mga haum-haom, impresyon, panan-awan kag pagbana-bana sang mga outsiders sa gobyerno.
Agud ipunto ang katampad sa pag-away sa ilegal nga droga, nagapaggwa ang national police sang ila statistics kun pila na ang nagsungka nga durogista. Ini nakambot na sa masobra 750,000 kag ginabanta nga magalambot pa sa isa ka milyon antes magtakop ang 2016. Sa sini nga numero, halos tres mil na ang nagkalamatay. Napatay sila sa police operations, sa police custody ukon sa kamot sang posible hired killer nga masami riding in tandem.
Makalilibog sang ulo nga-a amo na ini kainit kag kapintas ang otoridad sa mga durogista apang padayun pa sila sa gihapon sang pagbaligya sang ilegal nga droga. Pero nga-a masami man nagareklamo ang mga nadakpan nga madugay na sila nag-untat kag planted lang ang ebidensya sa ila?
Daw makasiling man kita nga base bala kun halos naubos na dakop ang mga durogista kag nagbag-o na gid man ang iban. Apang bangud sang mando nga dapat may madakpan nga durogista, mangtanom na lang ebidensya agud may accomplishments kag performance man kuno abi ang kapulisan. Ukon ini senaryo lamang agud ipakita sa publiko nga tuman ka lala ang ilegal nga droga agud may rason ang Duterte administration nga magpatuman sang mas makahas pa gid nga tikang?
Kun basehan ang natabu sa pelikula nga Our Brand is Crisis, daw matuod gid nga drama lang ang tanan. Dugangan pa nga ang nagakatabu sa pungsod subong masaksihan man sa mga episode kag eksena sa teleserye nga Probinsyano sang isa ka TV station.
Sang damlag lang nagpahayag si President Duterte nga posible nga suspendihon niya ang Writ of Habeas Corpus kun padayun nga maglala ang sitwasyon sang operasyon sang ilegal nga droga sa pungsod. Indi ayhan ginakondisyon lang ang paminsaron naton nga malala gid man ang ilegal nga droga sa punsgod agud may balasehan ang pagpatuman sang mas mapintas nga tikan sang gobyerno?
Sa dalagan sang mga hitabu subong, daw indi malayo nga matabu ini. Pila pa lang gani sadto ka semana sa Malaca@ang si Duterte nag-ako na sya nga nakapaminsar sya nga magdeklarar sang martial law bangud kuno sang kasangkad sang ilegal drug trade sa pungsod.
Ang pagkapatay ni Albuera, Leyte mayor Rolando Espinosa sa kamot sang PNP-CIDG apisar nga ara sya sa sulod sang karsel makakulogmat. Ini nagapakita nga bisan ang pulis may huyog na nga mamatay bangud may bendisyo sang Malacañang ang ila tikang. Indi bala nga ginhambal ni Duterte nga kargo niya ang mga pulis basta sa ilegal nga droga ang ila kampanya?
Haizt! Kun ang pulis amo na ang nagalapas sang kinamatarong sang ordinaryo nga Pilipino, kay sin-o na lang makapangayo sang pag-amlig ang mga tawo?
Ang pulis/military nga kriminal mas delikado pa sa duna nga kriminal. Kay sila makapanago lang sa kapa sang ila trabaho maabswelto na, apang ang mga duna nga kriminal indi basta-basta makahimo sang krimen bangud may otoridad nga nagabantay sa ila.
Sa karon ka-angay lamang nga ang otoridad na mismo ang nangin kriminal kag ina ang mas makatalagam.
Kabay pa nga ubayan kita sa Makaako!/PN
[/av_textblock]
[/av_one_full]
