[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAUTWAS ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY JOEL FRANCO
[/av_heading]
[av_textblock size=” font_color=” color=”]
Masubo nga Paskwa
PASKWA na naman. Tion nga ginahandum sang kadam-an sa paglaum nga may dala ini nga kabuganaan sa kabuhi nga nalubong sang kapi-utan. Ang Paskwa nagadala sang paglaum sa tanan nga nagakabuhi sa kadulom nga sa pihak sang kagab-ihon sigurado magabutlak ang adlaw sa kaagahon.
Pag-asa para sa tanan ang dala sang Paskwa. Sa pagkabun-ag ni Hesus, kasanag sang pala-abuton kag kaluwasan sa kalalat-an ang ginalauman.
Sa mga panimalay nga kumpleto ang myembro, bisan simple lang ang salu-salo, masadya na ang balatyagon. Pero ang mga panimalay nga kulang ang myembro bangud sang nagtaliwan ukon bangud sang pagtrabaho sa malayo lamang mahatagan sang mayo nga kabuhi ang pamilya, paano ayhan ginasaulog ang Paskwa? Masubo, indi bala?
Tanan kita nagahandum sang bug-os nga pamilya indi lamang sa Paskwa kundi sa adlaw nga tanan. Pero kun mabudlay gid ini nga matuman, bisan sa mga espesyal na lamang nga okasyon kaangay sang Paskwa.
Naganyat ako nga magsulat angut sa Paskwa kaupod ang pamilya bangud sang nag-viral nga video sang bata nga babaye nga tuman ang paghilibion bangud malakat na ang amay sa abroad agud magtrabaho. Masakit pamati-an ang palanambiton sang bata nga sa linghod nga paminsaron, kinahanglan na nga antuson ang kasakit nga mapahilayo ang amay.
Kina-andan na nga kabangdanan sang pagtrabaho sa abroad amo ang kakulang sang oportunidad sa trabaho sa pungsod. Ukon may ara man, kulang ang sweldo agud mabuhi sang matawhay ang pamilya nga mapabestihan, mapa-eskwela, mapakaon, kag mapabulong kun magbalati-an.
Ang mga Pilipino indi man gid garboso sa pagpangabuhi. Sa ordinaryo nga Pilipino, tuman na ang may hustohan nga galastuhon sa pagsabat sa mga kinahanglan. Ina ang ila inspirasyon agud magpadayun sa pag-antos sang kapung-aw sa ila pamilya.
Ang paghilayu-ay sang pamilya indi lamang bangud sang pag-abroad sang amay ukon iloy. Bisan diri sa Pilipinas kinahanglan man nga pagpalayo sa isa ka syudad ang breadwinner agud makapangita sang palangabuhian nga makasustento sa pamilya. Sa masami bangud ginakulang ang sweldo mas ginapili nga ipadala na lamang ang kwarta imbes nga magpauli agud makakinot.
Nga-a bala bisan diri ka sa Pilipinas kinahanglan gid nga magpasyudad ka agud makatrabaho? Ina bangud nga napabay-an na ang kaumhan kag ang sentro sang pagsanyog ara lamang sa kasyudaran. Bisan ang sector sang agrikultura nga amo ang mayor nga palangabuhian sang mga Pilipino kulang ang suporta. Bangud sang kakulang sang palangabuhian sa kaumhan, nagapasyudad ang mga Pilipino sa paglaum nga mabatak sa kaimulon ang pamilya.
Makakita man sang trabaho, may bulanan man nga sweldo, apang kulang sa kinahanglanon sang pamilya. Wala pa ang sweldo, ubos na sa pinangutangan ang mabaton sa 15-30 sang bulan. Prendado ang ATM card, halos wala na sang mabaton. Dugangan pa sang mga kumpaniya nga wala nagahatag sang husto kag standard nga sweldo sa ila empliyado.
Diri sa Kabisay-an Nakatungdan (Western Visayas) ang minimum nga sweldo P298 kada adlaw sa walo ka oras nga pagtrabaho. Kun isipon mo nga may pamilya ka kag kabataan, hustuhan bala ini? Maathag nga kulang gid katama. Ang isa ka serve sang sud-an pinakabarato P15. Sa tatlo ka beses magkaon ang tawo sa isa ka adlaw, pila na lang ang take home sang ordinary nga empliyado?
Magatakop na ang 2016, ano ayhan ang nagahulat sa aton sa 2017?
Base mahulog lamang sa pangako sa kampanya ang pasalig sang gobyerno nga pagtapos sang contractualization kag pagpataas sang sweldo sang mga empliyado sa pribado nga sektor. Ano naman ayhan ang ila irason kun indi ini mapatuman?
Hay, unta dunggon man ang hibubon-ot sang mga magagmay nga empliyado sa pribado nga sektor sang karon nga administrasyon. Indi lang sa droga ang kampanya kundi sa palangabuhian man kag ekonomiya./PN
[/av_textblock]
[/av_one_full]
