[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading tag=’h3′ padding=’10’ heading=’Speedy trial…i-Paskwa na sa mga priso!’ color=” style=’blockquote modern-quote’ custom_font=” size=” subheading_active=’subheading_below’ subheading_size=’15’ custom_class=”]
BY JOEL FRANCO
[/av_heading]
[av_textblock size=” font_color=” color=”]
SAMTANG nagakinalipay kita nga mga hilway sa pagsaulog sang Paskwa, may mga utod kita nga nagatulo ang luha sa kasubo samtang nagaabot ang oras sang Paskwa. Ini ang mga kauturan nga ara sa sulod sang karsel bangud sang mga kaso nga ginapangatubang.
Sa aton nga mga Pilipino ang Paskwa isa ka ti-on sang pagtililipon ukon reunion. Ini ang panahon nga nagatingub ang pamilya nga naggikan pa sa mga malayo nga lugar. Pero kun ikaw ang ara sa sulod sang karsel, wala ka sang paglaum nga makasaulog ang Paskwa upod sa imo pamilya. Ini maluwas lang sa ila pagbisita sa ti-on sang adlaw.
Sa mga babaye lang nga presho halimbawa sa Iloilo City Female Dormitory sa Bureau of Jail Management and Penology – General Luna, may 178 ka mga priso lakip na diri ang 164 ka mga may kaso nga ilegal nga droga. Ang ila handum amo nga makagwa subong nga Disyembre agud masaulog ang Paskwa kaupod ang ila pamilya. Pilit man nga nagapangisog apang kun makasugilanon sa media, alalangay lang ang mensahe…tani bisitahon sang ila pamilya kag mangin masadya ang Paskwa upod sa ila. Ang ila tingog nagakurog kag nagayambi tanda nga ginapunggan lamang ang emosyon.
Isa sa pinakamasubo nga kabuhi amo ang estorya sang 19 anyos nga si Feri Anne nga nabilanggo sa kaso angut sa ilegal nga droga. May isa ka anak nga sang madakpan sya isa pa lamang ini ka tuig.
Nagdako si Feri Anne sa iya lola matapos napatay ang iya amay nga isa ka military kag nagsunod man sa pihak nga kabuhi ang iya iloy makaligad ang pila ka tuig. Gin-ako man sang iloy ang iya kapaltahan apang suno sa iya ang mas masakit kay nasulit ang iya inagihan sa iya anak nga karon magadako naman nga wala sa iya luyo.
Subong man sa pihak sang masubo nga kahimtangan sa sulod sang karsel, ginpahayag ni Feri Anne nakakita sya sang pamilya sa kaupod nya nga mga priso. Sa sulod sang karsel sya nakaangkon sang iloy, utod, tiya kag lola.
Masubo man ang kabuhi sang isa ka 71 anyos nga lola nga si Maria (indi nya matuod nga ngalan). Indi lamang bangud sang iya pagkapriso sa kaso angut sa ilegal nga droga nga suno sa iya indi matuod, kundi ang makaupod sa sulod mismo sang karsel ang iya duha ka anak nga babaye sa kaso man nga angut sa ilegal nga droga samtang ang isa pa ginbyahe na sa Bilibid sa kaangay man nga kaso. Masubo paminsaron nga ikaw iloy maathag nga nagkulang ka sa pag-ubay sa imo kabataan sa pag-usoy sang tadlong nga dalan.
Ini sila duha lamang sa madamo pa nga masubo nga sugilanon sa sulod sang karsel. Pero ngaa amo gid bala ini ka damo ang priso subong? Siling nila bunga ini sang mainit nga kampanya kontra sa ilegal nga droga. Pero ini bunga man sang mahinay nga hulag sang hustisya sa pungsod. Hamakon mo nga may iban nga priso nga pila ka tuig na wala nagahulag ang kaso. Kuntani ang i-Paskwa sini sa ila amo ang speedy trial sa ila kaso.
Ang material nga bagay maalimunaw lang apang kun padasigon ang ila kaso kag madesisyunan gilayun ang ila kaso, mahatagan sila sang pamatbat. Sa hulubaton bala sa pulong nga sang mga teenagers…maka-move on na sila.
Subong man kun kamo may sobra, indi man malain kun magbisita kamo sa diin man nga karsel kag maghatag sang regalo ukon bisan gamay lang nga pakaon sa ila. Mangin instrumento kita kuntani sa pagpinta sang yuhum sa ila guya subong nga Paskwa./PN
[/av_textblock]
[/av_one_full]
