SA KADA dalan ukon taytay nga imo malabayan, may mga matutom nga nagtuon kag nagpasad sina agud nga mangin mapag-on, masaligan, kag daku ang mabulig para sa pag-uswag sang komunidad.
Talupangdon naton ang mga civil engineers sa aton palibot nga amo ang responsable sa paghuman sang mga proyekto kag istruktura nga aton ginatamdan.
Hatagan naton sang igtalupangod bisan sa makadali ang propesyon nga civil engineering, ilabi na nga madamo sang maanyag nga mga buildings ang nag-ulhot kag padayon nga naga-ulhot sa syudad kag probinsya sang Iloilo. Lakip man nga pila na ka bagyo kag kalamidad ang naglabay, kag posible may magalabay pa, kag ang tanan nga kahalitan nga natuga sang kalamidad ang ginatukod liwat ukon may ginapasad nga bag-o sa bulig sang mga civil engineers.
Ang bug-os nga bulan sang Nobyembre ginasaulog bilang Civil Engineering Month. Angay man naton ini nga hatagan sang igtalupangod bangud ang mga civil engineers amo ang aton katimbang sa pagpasad sang aton katilingban.
Ang manami nga karsada, malaba kag masangkad nga mga taytay, kag mga matag-as nga mga edipisyo ang natigayon nga mapasad bangud sa ikasangkol, abilidad, kaalam, kag kahugod sang mga inhenyero nga nagabulig sa pag-uswag sang aton pungsod.
Isa ka maathag nga halimbawa sini ang pagpabangon sa mga lugar nga ginlabayan sang mga bagyo. Ang mga nagkalaguba nga istruktura ang liwat nga kay-uhon, bag-uhon, kag patindugon sa bulig sang mga civil engineer.
Sa panahon nga hayahay kag sa panahon nga nagapanghayhay, sila ang yara sa aton luyo nagaunay. Handa sila nga magtan-ay sang serbisyo sa pagpasad sa anuman nga ginahandom sang mga tawo.
Diri sa syudad kag probinsya sang Iloilo, nag-umpisa ang pagsaulog sang Civil Engineering Month sadtong Domingo, Nobyembre 1, paagi sa balaan nga misa nga ginpangunahan ni Reverend Father Oscar Orbos nga gintambungan sang kadamuan samtang ginapalayag sa Facebook live.
Pagasundan ini sang madamo pa nga lihok nga hiwaton “virtually” bangud sa pandemya kag may mga aktibidades man nga himuon nga nagatuman sa health protocol kaangay sang physical distancing.
Ang Philippine Institute of Civil Engineers, Inc. ukon PICE Iloilo Chapter ang isa sa mga pioneer nga PICE Chapters sa pungsod. Ginpasad ini sadtong Hulyo 31, 1976 upod sa iban pa nga 17 ka mga provincial chapter. Una nga napasad ang Cebu Chapter kag nagsunod diri ang Iloilo Chapter.
Sadtong 1977, napasad ang mga founding members sang PICE Iloilo Chapter gikan sa grupo sang government Civil Engineers kag yadtong yara sa private practice. Nangin bunga ini sang paghimakas ni Engineer Ramon Hechanova nga amo man sadto ang National Secretary. Sadtong 1979, si Hechanova ang nangin PICE 3rd National President. Nangin instrumento siya sa madamo nga pag-uswag para sa organisasyon kaangay sang continuing Education Program kag ang pagbalhag sang “The Philippine Civil Engineer”.
Narehistro opisyal ang PICE Iloilo Chapter sa Securities and Exchange Commission (SEC) sadtong Hulyo 12, 1999.
Sa idalom karon sang set of 2020 officers, ang SEC registration ang nangin prayoridad suno sa plano ni Engineer Oscar “Richard” S. Garin Jr. agud hatagan ang PICE Iloilo sang iya opisyal nga puluy-an. Bangud plastado na ini, may nagapadayon man nga misyon nga irehistro ang tanan nga Ilonggo Civil Engineers kag mangin aktibo nga katapo.
Kapin na sa 1,748 ang mga civil engineers nga katapo man sang Philippine Institute of Civil Engineers, Inc. ukon PICE.
Madamo na sila sang proyekto nga natigayon nga nakabulig sa mga pumuluyo kag may yara pa gid sang ginapadayon agud wala untat ang serbisyo nga mahatag sa tawo.
Tuman sila ka damo nga mangin kabulig naton sa pagbangon sa tion sang kalamidad kag magapatahum sang komunidad para sa tayuyon nga pag-uswag.
Importante sila sa aton nga pagpangabuhi bangud sa matag-adlaw nga tanan, samtang nagataris sa dalan, nagalatay sa taytay kag nagatangla sa matag-as nga mga istruktura, sila ang yara sa likod sini tanan. Ang ila talento, ikasangkol, kaalam, kag kahugod sa ila propesyon amo ang magatib-ong sa aton padulong sa mauswagon nga palaabuton.
Sa ila liwat nga pag-aktibo, paghugpong kag pagbuyluganay, lauman naton ang mas masangkad nga serbisyo nga ila mahatag sa aton komunidad. Lauman naton ang mas matahum nga mga istruktura kag mapag-on nga mga proyekto nga ginahandom sang mga tawo.
Ipabugal naton sila bangud sila ang tagpasad sa pag-uswag sang aton komunidad kag sa bug-os nga pungsod.
Updan naton sila sa pagselebrar sang Civil Engineering Month sa sini nga bulan sang Nobyembre. (bertladera@gmail.com/PN)
