UNA SA TANAN luyag ta tamyawon ang aton abyan nga si Engr. Remegio “Reming” Gumban.
Gadalagan gali siya sa pagka-konsehal sang banwa sang Sta. Barbara. Three-termer ini siya nga ginduso sang iya mga abyan nga mag-serbisyo liwat sa banwa bilang konsehal.
Kon makaboto lang ako sa Sta. Barbara, imo gid ngalan Reming ang unahon ko tsik.Ugaling indi. Katahum sang imo plano nga pasanyugon ang negosyo sa imo banwa agud makahatag empleyo sa imo kasimanwa.
Sa karon gani, nakakuha na si Reming sing pasalig sang pila ka abyan nga negosyante nga mapatindug negosyo sa ila banwa. Good luck Reming!
***
Sa aton Demokrasya, ang gahum yara sa mga pumuluyo kag indi sa isa ukon pila lang ka tawo nga luyag maghimo sang bisan ano lang nga magustuhan nila.
Amo gani nga importante ang pagluntad sang mga partido pulitikal, nga ang isa nagaamlig kag ang isa nagabantay sa hulag sang yara sa pihak.
Sa sini nga palaabuton nga mid-term elections sa Mayo 13, 2019, natural nga “on the defense” ang administrasyon sa pagpanguna sang partido PDP-Laban kag ka-koalisyon sini.
Sa kampayahanay nga natalana sa Pebrero 12, sa bahin sang mga kandidato nasyonal, kag sa Marso 29 sang mga kandidato lokal, depensahan sini ang mga programa kag proyekto nga ginpangako kag ginapatigayon sini agud liwat makapungko sa poder.
“On the offense” naman ang partido kag ka-koalisyon sa oposisyon sa ila pagkritikar sang mga kakulangan kag kapaslawan sang administrasyon, nga ginapangunahan sang Liberal Party, para sa oportunidad nga makabulos man sa poder kag makapatigayon sang ila mga hingyo sa kaayuhan sang mga pumuluyo.
Sa sining ila sambuwa sa pagkumbinsi sang mga pumuluyo sa kon ano gid ang mas maayo nga hingyo para sa mga pumuluyo magagamit ini sila sang nagakalain-lain nga mga isyu, metodo, kag palautwasan – radyo, TV, pahayagan, social media kag iban pa nga gimmick.
Madamo sang istratehiya ang pwede mahimo. Kon ano man ina, ang importante nga malab-ut ang mga pumuluyo sa paagi nga mahapos nila ma-intiendihan.
In fact, wala ang mga kandidato sing kinalis sa mga negosyante nga nagabaligya sang ila produkto.
May General Merchandising, sa diin madamo nga produkto ang mapilian sang mga manugbakal.
May Niche Marketing man, sa diin ang focus yara lang sa isa ka produkto katulad sang sapatos nga Nike, Converse kag iban pa, kag delargo nga may isa lang ka tag ukon brand.
Sa pagkampanya sa eleksyon, may ginatawag man nga Micro-Targeting, nga daw pinasangkad nga Niche Marketing.
Sa Micro-Targeting, ang mga botante gina-classify sa lain-lain nga grupo – dalagku nga negosyante, gamay nga negosyante, lain-lain nga propesyonal, informal settlers (squatters), mangingisda, salespersons, kon ano nga radyo kag TV ang ginapamatian, kon ano nga peryodiko ang ginabasa, kon sin-o ang ila paborito nga artista kag celebrity, barkada, mga fraternity kag sorority, kag kon ano pa nga grupo sa ila partikular nga problema kag huyog.
Ang ideya diri amo nga ma-identify ukon mahibal-an sing temprano pa kon sin-o ang naluyagan na nila botohon kag ang kon sin-o pa pwede ma-persuade ukon makumbinsi magboto sa kandidato. Importante diri ang isa ka survey nga makagiya sa kandidato kon ano pa ang iya himuon agud magdaug.
Mauti ugaling ining micro-targeting kag magasto kaayo. Sa mga may kulang sang badget, sa masami ginapili lang nila kon diin nga grupo may padaug sila, katulad sang pagkampanya lang sa mga lugar nga may madamo nga botante, ang pagpangamusta door-door, kag ang magdala sang ila panghuna-huna angot sa mga dalagku lang nga isyu.
Katulad ina sang ginhimo ni Duterte sadtong siya nangampanya, sa diin nagtutok lang siya sa dalagku nga problema sa droga kag krimen, kag problema sang mga trabador.
***
In fact, pwede man gamiton sang oposisyon ang ining simple nga pangampanya – ang iguon lang ang mga mayor nga kapaslawan kag problema sang administrasyon kag ang mga isyu nga importante sa mga pumuluyo.
Lakip na diri ang problema sa presyo sang balaklon, ang aton relasyon sa Tsina kag Estados Unidos, kag ang personal nga pagtan-aw sang mga pumuluyo sa indibidwal nga kandidato.
Ti, good luck na gid lang sa inyo nga mga kandidato! Tani, ang mga labing masaligan gid sa panghimanwa ang mapilian. (w_mateojr@yahoo.com/PN)
