KASUHAN na! Ini ang atun panghangkat sa department of Interior and Local Government (DILG) sa mga kapitan nga nagapahilabot kag maathag nga nagapamolitika sa ila barangay. Indi lamang pamolitika kundi halkos ibaligya nila ang ila mga residente sa ila amo nga politico.
Diri sa syudad sang Iloilo maathag nga ang mga kapitan maka-Trenas man ukon maka-Espinosa ukon maka-Gonzalez, hayag sa ila ginahimo. Maathag ang ila pagpakita sang ila pagka-bias sa ila ginasuportahan nga kandidato. Ang malain pa kay ginapilit kag ginapahog nila ang ila pumuluyo nga wala nagasuporta sa ila kandidato.
Madamo na sang mga residente ang nagareklamo nga pilitay na ang ginahimo ni kap sa ila barangay. Dapat straight gid ang barangay kay may premyo nga nagahulat. Sang una P200,000 pero subong nga nagahilapit na, P1,000,000.00 na ang paon sa ila. Indi ini tanyag kundi paon para maghimakas ang mga kapitan nga mahatag ang straight nga kadalag-an kay amoy politico.
Sa diin bala ang konsensya sini nga mga kapitan? Wala pa kamo naayawan sa ginatunghol sa inyo sa tagsa ka meeting ninyo? Kulang pa ang inyo ginabaton ngaa asta ang pumuluyo nyo piliton nyo nga magsuporta sa inyo amoy kandidato?
Subong nga eleksyon ang pinaka kabalan amo ang mga kapitan. Pakita sang ila pagkapoderoso sa barangay paagi sa pag hakot sa ila mga tawo sa rally sang politico. Gutom ang pumuluyo, pero sila yuhumyuhom kay may cut na sa budget, may pakumkom pa si Cong sa ila.
Panawagan naton sa mga pumuluyo, indi na kamo magpainto sa inyo kapitan. Dako na ang ila nabaton sa mga kandidato kag kamo ang ila ginagamit nga capital. Sila ang dako algo, kamo ang makalolooy sila ang malipayon.
Pilitay na ini nga eleksyon. Kun kamo ginapilit ni kap, hambali nga ireklamo ninyo sa DILG. Tindugi ang inyo prinsipyo kun sin-o ang inyo kandidato indi suno sa dikta ni kapitan.
Kun masumalang nyo si kap bunoha ninyo kag hambalan “ Kap, wala gid ta da?” (jpranco1975@gmail.com/PN)
