NANGIN malawig ang kampanya sang pungsod sa mga Filipino nga magpabakuna kontra COVID-19. Nangin matig-a man ang ulo sang iban nga indi gid magpabakuna.
Apang sining karon lang nga nagdamo na ang bag-o nga variants sang COVID-19, hinali nagtaas ang numero sang mga gusto magpabakuna.
Diri sa syudad sang Iloilo, target nga mabakunahan ang 300,000 ka tawo nga naga-edad 18 anyos pataas agud malambot ang ginatawag nga herd immunity.
Sa una, wala gana ang tawo magpabakuna. Halos wala sang gusto magpalista sa ti-on sang rehistrasyon. Apang sadtong Huwebes, Mayo 13, ti-on sang A2 (senior citizen) kag A3 (may comorbidities) nga magpabakuna, napuno ang CPU Gym. Madamo ang nagdugok.
Suno kay Mayor Jerry Treñas may nagkadto nga wala pa ang ila schedule gani nag ginutok ang lugar. Pasalamat kita sa pamunuan sang CPI kay madasig man ang ila pag-akto sa hingyo sang pamunuan local nga buksan ang Rose auditorium.
Makasiling kita nga manami ini nga palatandaan kay madamo ang gusto magpabakuna. Nagtaas na ang ila ihibalo sa pagkaimportante sang bakuna. Ugaling wala nasunod ang husto nga protocol.
Sa baylo nga bakuna kag proteksyon ang makuha, base bala kun coronavirus ang makuha sang mga nagkadto.
Makatilingala lang ugaling kay madamo ang indi senior citizens. Syempre indi man natun mahibaluan kun comorbid ang tawo paagi lang sa paglantaw. Apang may mga reklamo nga nakapabakuna ang wala sa lista, may kilala sa city hall kag mga malapit nga tawo sa mga opisyal.
Kun sa bagay, kinahanglan ta nga hilway sa virus ang atun lider gani dapat wala man sang virus ang nakapalibot sa iya. Pero kabahin bala ini sang protocol?
Madamo ang nagapamangkot bangud nauna pa sila sa mga seniors kag mga comorbid. Ano ang ila kategoriya? Ano ang balasehan sa pagpili ila? Estado sa ikaayong lawas ukon estado sa sosyodad?
Sa pihak sini, mahatag man kita sang pagdayaw sa atun mga frontliners sa syudad sang Iloilo. Ilabi na sa sector sang ikaayong lawas. Ini bangud bisan ano kadamo ang nagdugok nga tawo sa vaccination venue, natigayun nila nga madumalahan sang husto ang sitwasyon.
Panginbulahan sa Public Safety and Transportation Management Office, General Services Office, City Health Office kag iban pa nga mga opisina sa city hall. Bisan may pagreklamo sa pagpanagil-ot sang iban, sige lang ang trabaho.
Kuntani sundon lang natun ang protocol sang pagpabakuna. Indi kita mag -panic kay hambal ni Mayor Jerry Treñas may bastante nga bakuna nga magaabot. Buot silingon matapudan ang una nga ara sa prioridad sang gobyerno. Ina kun indi magguba ang linya sa pagpanagil-ot sang iban nga may kilala nga gamhanan.
Sa 2,830 nga nabakunahan, sin-o ang ara sa prioridad? May ara ayhan nga nagpanagil-ot lang? (jpranco1975@gmail.com)/PN
