MASAKU na ang tanan sa pagpanghanda para sa 2023 Iloilo Dinagyang. Makita na ang amat-amat nga paggutok sang mga dalanon bangud man sa ginaplastar nga entablado sa mga judging area. May linyada naman para sa mga kiosko nga ipahamtang sa nadesignar nga lugar sa calle real. Kag nagakabit na ang mga banderitas, may mga tarpaulin kag mga signages nga napagkit na sa palibot.
Kaangay lang nga nagbangon kita sa malawig nga katulugon ang syudad sang Iloilo bangud sa pandemya. Nagalaum ang tanan nga makabawi kag mas makaganar karon nga tuig. Madamo sang mga sidewalk vendor kag mga ambulant vendor ukon nagalibod ang nagapagsik kag naga-antisipar sang mas daku nga bentahon gikan sa ila mga baligya.
Maathag man ang rason kon ngaa nagahimulat kita nga matigayon ang karon nga Dinagyang, ina tungod luyag naton nga makabawi, liwat nga makaselebrar kag mapun-an ang wala naton natigayon sang nagliligad.
Mas daku nga pabor ini sa mga negosyante tungod nga ang sadto nagadunglay nga negosyo, amat-amat na karon nasudlan sang kustomer kag benta, kag nagabangon na gikan sa kapigaduhon. Madamo na sang mga hotel ang okupado kag nakatigana sa mga luyag nga magsaulog sang Dinagyang sa Iloilo. May yara na sang 30 tubtob 40 ka hotel nga accredited sang Department of Tourism nga may kabug-usan nga 5,000 ka hulot ang nagsiling nga halos mapuno na sila.
Kinahanglan naton nga tutukan ang sa bahin sang ekonomiya, ano ang epekto sini sa aton pangabuhi, kag kon ano ang ginlabaw sini sa nagligad nga tuig antes ang pandemya. Nagapati kita nga kon madamo sang bisita kag nagagasto sa ila paglagaw sa Iloilo, makabulig ini para sa paghatag sang trabaho sa mga nawad-an sang trabaho kag makapasangkad sang operasyon ang mga negosyo.
Sadto, ginakwaan sang pahayag ang mga katapo sang Iloilo Hotels, Restaurants and Resorts Association tuhoy sa epekto sang Dinagyang sa ila negosyo. Ginatuad nila kon ano kadamo ang naga-booking sa mga hotel, sa palibot sang syudad, sa mga medyo sa sentro kag sa mga awas na sa syudad sang Iloilo.
Ginahibalo man ang bulyada sang pasahero nga nagasakay sa taxi gikan sa airport kag sa seaport. Nagatuad ang mga driver nga maayo ang ila biyahe tungod madamo sang bisita. Ang DOT, LTFRB kag LTO nagapanugyan sa mga driver nga maghatag sang angay nga kurtesiya sa mga bisita, indi mag-abusar, indi mamentaha kag ipakita ang manami nga akomodasyon.
Kabay pa kuntani nga indi malipat ang mga ahensya sadto nga nagahatag sang pahanumdom sa sektor nga ila gina-alagaran, nagapakigbahin sila agud nga mapabilin nga malinong kag matawhay, kag puno sang handumanan ang pagpabilin sang mga bisita diri sa Iloilo durante nga nagasaulog sang Dinagyang.
Dapat balikan ang mga maayo nga ginahimo kag partisipasyon sang tagsa ka sektor agud nga mangin mapuslanon ang ila pagpakigbahin kag katungdanan sa piyesta nga ginahandom nga saulugon sang tanan.
Sadto, ginakulang ang mga hulot nga teniran sang mga bisita rason nga indi lamang hotel kundi lakip man ang mga pension house, mga lodging house, kag mga balay nga may bakante nga kwarto nga luyag parentahan sang tagbalay ang gina-ingganyo sadto para sa akomodasyon. Naisip ang kadamuon sang hulot kag nahibaluan sadto kon pila ka hulot ang kulang sa kadamuon sang bisita nga nagpadulong sa Iloilo.
Sa subong, madamo na sang nagtindog nga hotel kag mga condominium. Mas madamo na sang pilian ang mga bisita kag nakita naton nga mas nagsaka na ang presyo akomodasyon sa mga hotel tungod man sa dikta sang ‘supply and demand’.
Ang amat-amat nga paghalog sang sitwasyon gikan sa puga sang pandemya mabatyagan na sang pumuluyo. Apang, angay lamang nga maghalong kag padayon nga magpasulabi sa pagsunod sa ginapanugyan sang mga health authorities agud nga indi kita mabutang sa peligro.
Ang pagtin-ad sang Dinagyang bilang piyesta nagapatin-ad man sa aton ekonomiya.
Lauman naton nga sa paglipas sang sini nga selebrasyon magapadayon ang kapagsik sang negosyo kag madamo ang makaagom sang trabaho. Magatuhaw pa gid ang madamo nga negosyo kag madamo nga oportunidad para sa mga Ilonggo.
Ipadayon naton ang partisipasyon sa sini nga selebrasyon para sa tayuyon nga pag-agom sang pagtinad nga aton ginahandom.
Buylugan naton kag indi pagmusingan ang matin-aw nga dagway sang Iloilo agud nga indi magtagam kag mag-atras ang mga bisita kag mga bakasyunista nga makabulig sa pagpapagsik sang aton ekonomiya. (bertladera@gmail.com/PN)
