TUMAN ka daku sang ginapain nga pondo sang gobyerno sang syudad para sa kahiwatan sang Dinagyang Festival kag sa kada tuig halos ginapadakuan ang badyet bangud man sa dikta sang panahon, kaangay sang nagamahal man nga mga balor sang mga pagkabutang nga ginakinahanglan sa preparasyon.
Nagapasulod na kita sa panahon sang kasadya, sang pagsaulog, kag sa pagselebrar sang piyesta ni Sr. Sto. Niño. Lauman na naton nga mangin masaku na ang tanan, mangin magutok ang karsada, kag apektado ang ilig sang trapiko sa mga lugar nga pagagamiton bilang judging areas sa paindis-indis sang pagpasundayag sang mga tribu.
Sa masunod nga semana, Enero 11, una na nga matublag ang mga dalanon bangud sa pagparada sang mga tribu kag pagpasundayag sa nagalinagabong nga mga tambor.
Halos 90 poryento na nga preparado ang mga tribu para sa sini nga pagpasundayag nga una nga makapukaw sa interes kag pang-ino-ino sang mga pumuluyo kag mga turista nga nagapatimaan sang pagbatyag na sang ispirito sang Dinagyang.
Nakabaton na ang tagsa ka tribu sang 900 mil pesos nga pauna nga subsidy sa kabug-usan nga 1.2 million pesos nga subsidy.
Igahatag naman ang nabilin nga 300 mil pesos sini nga una nga semana sang Enero agud nga lubos nga magamit sang tagsa ka tribu sa ila mga kinahanglanon agud nga mangin maayo ang pagpasundayag.
Nangin palaligban man sa tagsa ka tribe manager kon paano paiguon ang badyet nga ginahatag sa ila bilang subsidy kag diri nagtuhaw ang sugilanon tuhoy sa daku nga sukot sang mga choreographer ukon sa mga nagahanas sa ila mga tribu kag nagatudlo sa kon paano mapanami ang ila performance, kon ano nga konsepto sang pagpasundayag ang angay nga ipakita agud nga magpangibabaw sa kompetisyon.
Daku nga bahin sang pondo ang nagakadto sa choreographer rason nga dapat may yara sang polisiya kon paano gastuhon ang pondo. Dapat mapahat-pahat kon pila ang para sa choreographer, para sa costume, para sa props, sa pagkaon, sa transportasyon kag iban pa nga kinahanglanon.
Dapat may limitasyon kon kutob sa pila lang ang mahimo nga ibayad sa nagatudlo agud nga ang daku nga bahin sang badyet ang indi pagkulangon para sa iban pa nga kinahanglanon.
Tion na nga dapat pungkuan sang DepEd-Division of Iloilo City kaupod sang mga principal kon paano dumalahan sang lubos kag epektibo ang ginatugyan nga subsidy sa ila. Dapat tun-an ko pila ka porsyento ukon bahin ang magakadto sa isa ka galastuhan. Kon may magdugang nga pondo gikan sa mga sponsor, angay bala nga hatagan dugang nga porsyento ang choreographer bilang? Kon hatagan, pila ka porsyento?
Dapat likawan sang mga buluthuan ang mag-abono sa galastuhan, likawan ang magpangabay sa mga pulitiko para sa sponsorhips ilabi na nga panahon sang eleksyon.
Tion na nga magbalay sang maathag nga polisiya sa kon paano gastuhon ang subsidy agud nga wala sang may magpamentaha kag indi magkaproblema ang naga-uyat sang pondo.
Mangin hayag lamang ang tanan kon may maathag nga pagsulundan nga mahangpan sang tanan kag agud nga malikawan ang patuyang nga paggamit sang subsidy. (bertladera@gmail.com/PN)
