TUBTUB sa sining ulihi, mabaskug pa gihapon ang popularidad ni Presidente Duterte.
Amat-amat na ugaling nagalus-aw ini tungod sa “political fatigue”, ukon “kakapoy”na sa bahin sang madamo na nga pumuluyo sa pag-upod sa iya, kag tungod sa “disillusionment” ukon pagkadula sang pagsalig sang madamo man sa ikasarang sang gobyernong Duterte agud masabat ang mga problema nga ginaatubang sang mga pumuluyo, labi na gid sa sining panahon sang COVID-19.
Sadtong kampanya sang Mayo 2016, todo suporta gid ang mga pumuluyo sa kay anay Davao City Mayor Duterte. In fact, nagdaug siya nga may daku nga boto – mga 16 ka milyon sang mga 40 ka milyon nga botante sadto.
Tungod ina sang pagpati sang nagboto sa iya nga masabat niya ang padayon nga problema sa krimen, droga kag korapsyon nga nagapugong sang pag-ugwad sang pungsod paagi sa isa ka masaligan nga liderato.
Pero masaligan gid bala ato nga liderato?
Sang meyor pa si Duterte sang Davao City, ginkilala siya nga wala kaluoy sa mga kriminal. Ginkilala gani siya bilang “Punisher” kag “Duterte Harry”, ang bansag nga ginhatag sa iya sang mga fans ni Clint Eastwood sa iya pelikula nga Dirty Harry.
Si Dirty Harry, sa pelikula, isa ka detektib nga pulis nga wala sing patawad sa mga kriminal kag ang iya lang personal nga kasuguan ang iya ginatuman, nga sa
masami nagatapos sa kamatayon sang suspetsado.
Sa bahin ni Duterte, sang Presidente na, ginpamahog gid niya nga pamatyon niya ang mga kriminal kag ang mga drug pusher kag druglord.
In fact, sa rekord lang sang kapulisan, nagalab-ut sa mga 6,000 – sobra 10,000 sa report sang mga human rights advocates – ang napatay sang mga pulis sugod sang pagpungko niya sa poder sadtong 2016.
Nagbatu kuno sa mga otoridad, apang wala nagapati sini ang mga human rights advocates. Hungod kuno nga ginpatay paagi sa “extrajudicial killings” nga labag sa “due process” kag “rule of law”. May nag-file na gani sing kaso nga “crime against humanity” kontra sa kay Duterte sa International Criminal Court.
Bale wala man gani sa iya mga botante ang salawayon nga pamatasan ni Duterte. Gintawag sini nga “stupid” ang Diyos. Gintawag man niya si Pope Francis nga “son of a whore” (Anak ng puta). Ginkalipay man gani niya nga tani naka-partisipar siya sa paglugos sang isa ka “beautiful Australian nun”. Kag sa gihapon mataas ang trust rating niya!
***
Sa nasiling ta na, amat-amat na gid man nagabatyag sing “political fatigue” ang mga pumuluyo sa liwat-liwat nga “pagpamahog” kag “pamuyayaw” si Duterte sa kon sin-o lang luyag niya paukpan.
Labi na gid kay wala man naaputan ang iya mga pangako sadtong kampanya batok sa krimen, droga kag korapsyon. “Naglala gani!” tugda gani sang sadto supporter niya. Kag pwede na makasiling ang iban: “Tama na, kapoy na kami sa pag-suporta sa imo dramatics!”
Puro man lang kuno laway ini kon ang involved ang iya mga langga-langga. Ginahinabunan pa gani niya ang mga kasaypanan nila tungod wala man sing may napasaka nga kaso sa bisan isa sang iya corrupt nga sumulunod.
Nagapabaskug pa gani ini sang suspetso nga kahimbon pa si Presidente sa kamalamalahan sa pagbakal sang binilyon ka pesos nga pandemic supplies, sunu kay Senador Gordon.
***
Yara man ang “disillusionment” sang mga pumuluyo sa mga negatibo nga development katulad sang isyu sang korapsyon sa pagbakal sang pandemic supplies. Imagine, P625,000 lang ang kapital pero nakakuha kontrata nga sobra P8 ka bilyon!
Yara pa gid ang halos wala pagkabalaka sa mga kahimtangan kag kinahanglanon sang mga health workers nga sa tion-tion nagataya sang ila kabuhi.
Gina-reklamo man ang pagpabaya sa pag-provide sang bagay nga pagtatap kag mga bulong sa mga “severe” kag “critical” nga mga pasyente nga tani naluas pa.
Kulang man ang suporta sa mga ginagutman kag mga negosyo nga makabulig pabangon tani sang aton ekonomiya.
***
Tungod sini, amo man gihapon bala nga klase sang suporta nga ihatag sang mga botante kay Presidente Duterte kon magdalagan siya sa pagka-Bise Presidente upod sang mga kandidato niya sa 2022 nga eleksyon?
“Laban-laban seguro indi na,” tugda sang observer naton.
Kinahanglan lang sang oposisyon, siling niya, ang isa ka alternative proposition nga mas madinalag-on para sa pagsabat sang problema sang mga pumuluyo batok sa kriminalidad, droga, korapsyon, kag kaimolon sa isa ka pungsod nga makatao kag maka-Diyos./PN
