DAW MAKATILINGALA man nga timprano pa nagdiga sang iya baraha si suspended congressman Jerry Treñas. Malayo pa ang eleksyon pero ginbuyagyag na niya ang ngalan sang iya mga kandidato sa pagka city councilors.
Sang una ginbuyagyag niya ang iya plano sa pulitika kun ti-on na sang filing sang certificate of candidacy (COC). Ngaa ayhan nagbag-o ang stratehiya ni Treñas?
Ang election sa may 2019 pa. Ang filing sang COC sa Oktobre pa. Ina kun may eleksyon gid man.
Kun may eleksyon gid man sa 2019, indi ayhan mahinay ang hulag ni Mayor Joe kun gusto nya magpadalagan sa pagkaalkalde sang syudad? Ngaa wala pa sya sang pahayag kun ano ang iya plano?
Wala pa kita sang mabati-an kun kay sin-o sya maga-alyansa. Indi kaangay kay Treñas nga timprano pa nagapamolitika.
Ngaa nagasiling kita nga timprano pa nagapamulitika si Treñas?
Madumduman nyo Marso 2 sang nagdeklarar si Treñas nga magapadalagan sya bilang alkalde sang syudad. Gusto nya nga kuhaon liwat ang iya anay posisyon. Ginsundan ini sang mga Liga ng mga Barangay sa kada distrito nga nagpahayag sang suporta sa iya nga mangin alkalde sang syudad kag kay Mayor Joe bilang kongresista.
Sa pamatyag ninyo, iya gid ayhan ini nga hulag sang mga kapitan ukon may tawo nga nagasindot sang ila alatrasan agud maghimo sini nga tikang?
Wala man naton ginapakanubo ang atun mga punong barangay, pero maathag nga nagapaggamit sila sa interes sang tawo nga gusto magbalik sa renda sang syudad.
Kun nagapati si Treñas nga mahuyang si Joe III kag mas mabakod sya, kinahanglan gid bala nga magabalik sya sa pagkaalkalde kag idis-og ang iya bilas? Mahimo naman sya makagamit sang iya impluwensya agud maganyat ang mga kapitan nga suportahan si Mayor Joe. Indi naman guro kinahanglan nga magpadalagan gid sya?
Gusto nya ayhan nga dampigan ang renda sang syudad ukon mas gusto nya nga mag-uyat gihapon sang poder bangud manugtapos na ang iya termino bilang kongresista?
Maathag nga panic mode na si Treñas gani tuman na kahayag ang iya mga hulag subong. Maathag nga gusto nya nga ma-pressure si Mayor Joe III nga magdesisyon na.
Pero daw matanda man maghampang sang iya baraha si Joe III. Amo na nagasalangisag na si Treñas kun ano ang iya himuon.
Kun pamati-an mo sa mga media interview gusto pagwaon ni Treñas nga si Joe ang indi gusto makig-alyansa sa iya. Apang daw wala gid nagadulot ang iya diskarte. Pareho lang nga mas naggwa nga underdog si Joe III samtang si Treñas daw nagalawaylaway gid nga mangin alkalde liwat.
Tani pahuway na lang sya kag hatagan naman sang kahigayunan ang iban nga makapwesto sa renda sang syudad. (jpranco1975@gmail.com/PN)
