NI Cyrus M. Garde
Syudad sang BACOLOD – Duha ka jail guards ang mahimu mapahalin sa ila puesto kon mapamatud-an may sala sila sa pagpalagyo sang isa ka priso sadtong Domingo sang hapon gikan sa Bureau of Jail Managament and Penology (BJMP) sa Syudad sang Talisay, Negros Occidental.
Ining duha nga sanday Jail Officer 1 Junel Moreno kag Jail Officer 3 Victor Servo gin-restrict na subong sa Talisay BJMP samtang ginapatigayon ang imbestigasyon kag paglagas sa nalagyo nga priso nga si Arman Toledo Penalo, 24, soltero kag taga-Syudad sang Talisay.
Siling pa ni Senior Jail Officer 3 Leo Lacerna, hepe sang BJMP-6 Investigation and Detection office, nga ginmando man kanday Moreno kag Servo nga mag-eksplikar paagi sa sulat sang natabo nga pagpalagyo.
Nahibaluan nga nalagyo si Penalo matapos ginsugo nga maghaboy sang basura sa gwa sang BJMP.
Ini sia ang nagapangatubang sang mga kaso nga robbery kag frustrated murder.
Tion naman nga kon mapamatud-an nga may kapaltahan sa ila obligasyon, sanday Moreno kag Servo magapangatubang sang kaso administratibo kag mahimu mapahalin sa serbisyo.
Samtang, kasunod sang pagpalagyo ni Penalo, gin-relieve naman si Jail Senior Inspector Nilon Magbanua bilang warden sang Talisay BJMP.
Ginbuslan sia subong ni Jail Senior Insp. Felix Sariana nga gikan sa BJMP-6 kag anay administrador man sang Guimaras BJMP.
Naka-agi man warden si Sariana sa Cadiz BJMP sa Negros Occidental pila na ka tuig ang nagligad./H
