ANG Suggested Retail Price (SRP) sang produkto masami naton makita nga nakapaskel sa mga sari-sari store nga nagabaligya sang softdrinks, katulad sang Coca-Cola, Pepsi Cola, kag iban pa.
Ginahimo ini sang ila kompaniya agud mangin competitive ang ila presyo sa karibal nga mga produkto dira mismo sa sining mga retail outlet.
Ining bukas kag gina-anunsyo sa publiko nga SRP sang ila produkto nangin popular na gani nga gimik sa negosyo sang sining mga kompaniya.
Nangin daku man ini nga bulig sa mga bumalakal kay ang kompaniya mismo ang nagadikta sa pagpanubo sang presyo dira mismo sa retail outlet nga indi na sila mangita kon diin makabakal sang mas barato nga softdrink.
Of course, tungod “suggested” lang ang ining presyo, mahimo man magpataas presyo ang retail outlet kon ang iya pagkuha sang produkto nagakinahanglan sing dugang nga gasto sa iya bahin.
Maathag ugaling ang epekto sini kon indi magkapreho ang presyuhanay sang pareho nga produkto bisan man sa kaso nga wala sing may nakapaskel nga SRP nga notisya.
Katulad lang sa duha ka mgkalapit nga retail outlet sa diin nagabakal ako sang isa sining softdrink.
Tungod mas mahal ang kuha sang retail outlet sang iya stock, nagabaligya siya sing P16 kada 12-ounce sang produkto. Sa pihak P15 lang. Natural didto ako nagabakal sa mas barato.
***
Sa kaso sang SRP sa bugas, nga ginapatuman sa karon (sa Nobyembre 17 pa sa Iloilo, sunu kay DTI-Iloilo Director Diosdado Cadena), matabo man ina kon lain-lain ang presyo sang kapareho nga klase sang bugas.
By the way, sa Memorandum of Agreement sa tunga sang Dept. of Agriculture, NFA kag Dept. of Trade & Industry (DTI) sa sining karon, indi lang ga-monitor sang presyo sang bugas ang DTI, luas sa na-assign sa ila sang Price Act, kundi pwede man ini mangdakop sang mga naga-violar nga retail outlet.
Pareho sa ginapatuman sang mga negosyante sa softdrink, ang SRP sa bugas indi man ginapilit ini nga presyo sa retail outlet kon indi gid pwede tungod sa mas daku nga gasto.
In fact, na-istoryahan man sang mga otoridad ang kon ano gid ang dapat nga SRP sa bugas para sa mga supermarket kag mall tungod sang ila lain nga kahimtangan ikumparar sa mga public market.
Sunu kay Cadena sa aton exclusive nga interview naton sa iya, wala dayon ginapadakop ang naga-violar nga retail outlet. Ginapatawag anay ini “to show cause” kon ngaa indi sila dapat dakpon kag patawan sang penalidad.
Ang penalidad nagalab-ut sa P2,000 tubtub sa isa ka milyon ka pesos kag ang pagkansela sang lisensya sang retail outlet.
Dapat mapamatud-an sang retail outlet nga justified ang pagpataas sini sang iya presyo sa idalom sang “rule on overpricing” sa idalom sang Price Act agud mapasensya, siling ni Cadena.
***
As of Nov. 12, 2018, sunu sa price monitoring sang DTI-Iloilo, ang mga prevailing price sang pila ka bugas sa Iloilo Central Market sa siyudad sang Iloilo kontra sa SRP amo ang masunod: P45 kada kilo sang Regular Milled Rice Local (SRP – P39); P50/k sang Well Milled Rice Local (SRP – P44); P47/k sang Premium Rice Local (SRP – P47).
Samtang, sadtong nagligad lang nga semana ang bili sang bugas sa iban nga bahin sang pungsod ginbalita sa masunod nga mga bili: (Datos sang Philippine Statistics Authority): Regular Milled Rice P43.12/k wholesale, P45.83/k retail; Well Milled Rice P46.04/k wholesale, P49.73/k retail.
P48/k ang average price sa Metro Manila; Zamboanga del Norte, P58/k; P55/k sa Mountain Province, Palawan, Bohol, Iloilo kag Southern Leyte; Tawi-Tawi P34/k. (w_mateojr@yahoo.com/PN)
