KALUOYAN sang Diyos si Presidente Duterte sa daku niya nga kasal-anan sa pagtawag sa Diyos nga “stupid”, ukon wala namang-an, sa pagtuga sini kay Adan kag kay Eba.
Wala lang niya gin-insultuhan ang Diyos nga ginatuohan sang halos 90 ka porsyento nga mga Kristiyano sa pungsod, kundi sang lapaw duha pa ka bilyon nga mga Kristiyano sa kalibutan.
“What is this stupid God? You created something perfect and then you think of an event that would destroy the quality of your work,” siling ni Duterte, sa pag-quote sang Inquirer, parti sa pagtuga sang Diyos kay Adan kag Eba kag pagpakasala sini nila sa pagkaon sa ginadilian nga mansanas.
Sa matuod, sala si Presidente sa pagbasol sa Diyos sa kasal-anan nanday Adan kag Eba. Indi ta mabasol ang Diyos sa pagpakasala sang duha. Gintagaan sila sang Diyos sing Kahilwayan sa pagpili sa tunga sang Maayo kag Malain agud mapaseguro ang ila pagkatutum sa pagkamatarong sang Diyos. Gani, kon nagpakasala gid man sila ina ila gid lang kasal-anan.
Kabay nga may kapatawaran pa si Presidente sa pagpakamalaut sang palangga naton nga Diyos.
***
Ginakasubo gid naton ang natabo sa isa ta ka utod nga Ilonggo nga nangayaw sa pag-ubra kag napatay sa Metro Manila pagkatapos nga gindakop siya sang mga pulis kag mapriso tungod sa pag-istambay sang dis-oras sa isa ka tyangge nga wala sing pang-ibabaw nga bayo.
Ang ining pagdakop kay Genesis “Tisoy” Argoncillo sang Barangay Bagongon, Concepcion, Iloilo angot sa mando ni Presidente Duterte agud limpyuhan ang dalanon sang mga istambay (tambay, sa tagalog).
Upod kita sa Presidente sa pagsaway sa mga tawo nga pa-tambay-tambay lang nga wala naman sing maubra kundi ang mag-istambay lang sa dalanon, labi na gid sa kariit sang panahon sa subong nga lapnagon ang pagpangawat, kidpnapay, kag pagpatay.
Okey man lang ina kon nagapahangin-hangin lang sang malinong ukon nagasugilanun sing matawhay kag indi perhwisyo sa mga kasilingan, kag wala naman nagalabag sang aton mga kasuguan. Kinamatarong man ina nila sa ila kahilwayan bilang pumuluyo sang hilway nga pungsod.
Ang problema ugaling kay wala sing maathag nga guidelines ang mga pulis bahin sa sining pagpangdakop sang mga tambay. Gani ang natabo nagapinagusto lang ang mga pulis sing pagpangdakop.
In fact, daw wala man gani sing kasuguan kontra sa pagtambay. Kon may ara, ina sa mga gawi nga ginadumili sang mga lokal lang nga mga ordinansa.
Ang mga ini wala man gapalahero. May ara nga ginadakop tungod wala sing pang-ibabaw nga panapot sa lugar nga wala naman sing ordinansa nga nagadumili sini. May ara man kon tubtub ano oras lang nga puede maka-inom, nga lain man sa iban nga lugar. Sa siyudad sang Iloilo, wala na sing inom pag-abot sang a las dos sang aga agud malikawan ang masami nga kinagamo sa Smallville.
Sa nahibal-an man naton diri sa siyudad sang Iloilo, ang pagdumili sa pag-uba sang bayo natumod lang sa sulod sang merkado publiko. Kon may kasubong nga pagdumili iya na ina ya sang mga pribado nga mga supermarket sa ila man kaugalingon nga regulasyon.
May dapat man pahamtangan sang suspetsado sa nagakabagay nga kulungan. Indi mo masimpon ang suspetsado nga may mamag-an nga kaso upod sa mga may mabug-at nga krimen. Sa kaso ni Argoncillo, ginbutang siya upod sa mga priso nga hurong nga nagsapote todo-todo sa iya tubtub mapatay.
Tungod pagusto lang sa pag-interpretar ang aton kapulisan kon ano ang bagay nila himuon, ang natabo amo nga daw wala na sing kasuguan.
***
Bilang isa ka demokrasya, ang Pilipinas nagatindug sa kinamatarong sang kada pumuluyo sa hilway nga pagginawi basta indi lang siya makatapak sa kinamatarong sang iban kag, kon makasayop gid man, nga matagaan siya sing kinamatarong sa pagsabat sang mga reklamo kontra sa iya.
Pila ka importante nga kinamatarong sa aton Demokrasya amo ang “right to due process” kag “right to a fair and public trial”.
Sa idalom sa sining kinamatarong, ang pag-sita kag pagdakop sang isa ka pumuluyo dapat sandig sa maathag nga kasuguan (rule of law) kag indi lang sa haum-haum sang pulis.
Salamat lang kay sa Iloilo ginakilala ini sang aton kapulisan diri. (w_mateojr@yahoo.com/PN)
