MAAYO gid ining ideya sang Iloilo City Hall sa pagpatuman sang Quick Response (QR) Code sa kada empleyado, lakip na ang mga bisita, sa city hall nga maka-identify sa ila sa pagsulod kag pagwa diri, samtang gina-check sa kada tion kon sin-o ang COVID-19 positive ukon bagay nga ipa-quarantine.
Ginapatigayon na gani ini sa siyudad tubtub sa kabarangayan agud mapahapos kag mas madinalag-on ang trabaho sang city health office sa contact tracing sang mga na-close contact.
Gin-announce ang pagpatuman sining QR Code ni Executive Assistant Francis Cruz sa media sadtong Nobyembre 16, 2020. Mga 40,000 na ang na-rehistro sang city hall tubtub sining ulihi, apang suspendido ini anay, as of press time, tungod sa nangin problema diri sang labi nagadamo nga luyag magpa-rehistro sa QR Code.
Ginaplano man gani nga ipatuman ining QR Code sa mga business establishment kag mga pribado nga mga upisina diri sa siyudad.
Ining QR Code, sunu sa DOLE, pwede makakuha sang body temperature, contact details, kag madasig nga tracing sang mga empleyado kag mga bisita.
***
Ang QR Code system mas madasig kag masaligan nga paagi sang contact tracing ikumparar sa manual.
Indi mahimo ini sa manual contact tracing kon diin kinahanglan mo pa pangabudlayan nga matultulan ang na-close contact nga wala ka sing bisan ano nga contact detail sa iya.
May mga reklamo ugaling ang pila ka pumuluyo sa siyudad parti sa pagpatuman sining QR Code.
Ang isa sini amo ang reklamo nga indi sila maka-access sa QR Code. Ngaa ayhan? Problema sa server?
Ang mga tulugyanan sa mga barangay nakamuno man nga ang pagpa-rehistro sang mga pumuluyo sa QR Code nagabutang sa ila sa peligro sang infection. Dapat, sa siling nila, nga may nagakaigu sila nga pagpangamlig nga mabuligan sang siyudad.
May yara gani nga nahadlok gid sa sining QR Code tungod sa kinamatarong nila sa privacy, ukon pang-kaugalingon nga ihibalo. Labi na gid sa posibilidad nga ma-locate sila sa ano man nga tion kag lugar sang city tracker nga mahimo naman sang moderno nga electronic tracker sa karon. Ma-locate gani ang naka-on nga cellphone!
Tungod sini, pwede bala mapilit ang isa ka pumuluyo kon indi siya magpasakop sa sining QR Code? Pwede seguro kon mapasalig siya sing siyudad nga wala naman sing delikado ukon ma-prejudice sa kinahanglan nga impormasyon.
Sa pila ka mga pungsod, lakip ang Estados Unidos, ang kinahanglan ma-detain nga akusado pwede makagwa sa detention samtang gina-trial basta sugot siya nga i-monitor ang tanan niya nga hulag sa gwa paagi, por ejemplo, sang electronic ankle monitor.
“Aba, indi ina ya pwede! Ano ako kriminal?” ang madale nga masaligbat sang kon sin-o sa aton nga daku ang paghatag importansya sa privacy.
Wala man seguro luyag nga mahibal-an sang iban ang iya bank account sa diin man nga information query tungod sa malain nga epekto sini sa kahimtangan sang iya financial standing, labi na gid kon apektado sini ang iya credit ukon borrowing capacity, nga dapat lang ang gapahulam nga bangko ang makahusgar.
Wala man seguro sing luyag mabuyagyag ang iya health condition nga dapat ang kahibalo siya lang kag ang iya doktor. Kag ang iban pa nga mga bagay nga pwede ilikom sa publiko luas lang kon ginasugo sang husgado para mapatuman ang hustisya.
Wala kita ugaling kahibalo kon ano nga impormasyon ang kinahanglan sa QR Code sa siyudad. Pwede na seguro ang ngalan lang, cellphone number kag/ukon email address.
Indi lang agud ma-locate ang tanan mo nga hulag sa ano man nga tion kag kon diin nga lugar!
Daw kriminal ka sina, sa nasiling gani naton, kag wala ina nagakaigu sa aton pagpuyo sa Demokrasya!
Importante man nga kon may iban nga impormasyon nga pwede mahibal-an sang city tracker, nga indi naman kinahanglan sang contact tracing, nga matago ini in full confidentiality sa publiko kag ma-delete kon indi na kinahanglan.
Anyway, ang ining QR Code para man lang sa contact tracing, indi bala, Sir Francis Cruz?
***
Pasalamatan ta man gali si Denso Wave Company Engineer Hara Masahiro, ang nag-imbento sang QR Code sadtong mga 20 anyos nga nagligad, labi na gid kay wala niya ginpa-patent ini agud magamit sing libre sang bug-os nga kalibutan./PN
