SIN-O GID man sa mga kandidato ang ginahilas? Sin-o sa ila ang apektado sang kainit sang panahon kag sang nagadabdab nga sitwasyon?
Kapin 13 ka adlaw na ang nakalipas sang nagsugod ang kampanya sang mga lokal nga kandidato. Kapin isa ka bulan na lang ang nabilin kag magatakop na ang pagkampanya apang may yara na sang ginakibang. Indi madula ang kahadlok kag kahangawa. Nagabisita sa ila paminsaron kag balatyagon ang dagway sang kalutusan kag nagapaminsar na sa kon ano ang ila himuon kag irason pagkatapos nga mapaslawan sa eleksyon.
May mga kandidato nga nagayuhum sa atubang sang tawo apang nagakurisong kon nagatalikod na. May mga kandidato nga mabugnaw ang pag-abi-abi sa ila sang mga pumuluyo kag wala man sang init ang ila pagpangumusta.
Madamo man sang nagapakita sang ila kusog paagi sa pagtipon sang madamo nga tawo agud nga magtambong sa ila mga pamulong-pulong. May mga tawo nga boluntary nga nagakadto, may ginpilit sang mga opisyales, kag may indi makabalibad sa pangabay sa ila.
Sa pihak sini nga pagpahulag sa mga pumuluyo agud nga ipakita ang ila pwersa, may mga kandidato naman nga nagapakun-kuno nga wala sang ikasarang magtipon sang tawo bangud wala sang inuggasto.
Sa pulitika, ang madamo sang tagsakdag amo ang nagadaug. Ang ginatyangaw samtang nagapamulong-pulog ang magabulahog sa kalutusan.
Posible nga may mga likom nga magaboto sa iya apang indi niya madapit ang mayoriya agud nga pilion siya. Tuhay ini sa madamo nga nagasakdag, nagapakita sang ila hayag nga suporta kag wala nahadlok nga makita sang mga opisyales nga yara pa sa posisyon.
Samtang naga-init ang kampanya aton lauman ang pagtuhaw sang madamo pa nga mga propaganda. May mga mahigko nga diskarte sa kon paano lupugon ang kasumpong. Ila nga lamhitan sang higko agud nga kangil-aran sang mga botante ang ila kasumpong.
May mga ulianon man nga mga propagandista nga liwat ginapabangon ang madugay na nga isyu agud liwat nga pakalainon ang iya kasumpong.
May mga tinawo man ang mga kandidato nga magagamit sang ila kusog agud nga pahugon ang mga botante. May mga opisyales sa barangay nga ipiton ang ila kasimaryo agud nga botohon ang ila kandidato.
May mga kandidato nga nagapakuno-kuno nga wala sang kwarta apang nagabaton man sa mga negosyante kag ila ginagamit sa pagpadalagan sang ila kampanya.
Lauman pa naton ang mas damak nga kampanyahanay samtang nagahilapit na ang piniliay. Madamo pa sang mga drama kag himo-himo sang istorya kag senaryo ang aton mabatian kag makita.
Tandaan lang nga samtang ginahugot naton ang pag-uyat sa tawo, mas sila nga magapanginpadlos kag magatinguha nga makalusot sa giha sa tunga sang imo mga tudlo.
Kon gusto ninyo nga magpabilin ang botante sa inyo palad, dapat itungtong sa palad nga nagahumlad kag nagahatag sang libertad nga sila ang makahulag.
Ang propaganda duna nga hilikuton. Matin-aw kon matinlo ang tuyo, maitom kon mahigku ang bokhu.
Makabulig ang propaganda sa pagganyat sa mga botante apang kuntani indi paggamiton agud ilubong sa lunang ang kasumpong.
Kuntani indi pagtugutan nga ang propaganda magguba sa maayo nga kaantanan sang mga kandidato nga magkakilala man lang. (bertladera@gmail.com/PN)
