ANG PAGBALIGYA sang hingalit nga kalipay isa sa pinakatigulang nga trabaho sa bug-os nga kalibutan. Bisan sa Bibliya, nasambit ang prostitusyon. Ang Bibliya nagakondinar sini nga gawi.
Diri sa syudad sang Iloilo ginkumpermar ni Task Force on Morals and Values Formation head Nestor Canong nga madata sa gihapon ang prostitusyon. Ini ang napili nga palangabuhian sang mga babaye kag bisan man mga lalaki.
Makakilibot lang kay may ara nga nagaedad na 45, 50 kag 60 anyos nga padayun pa sa sini nga buluhaton lamang may ipakaon sa ila pamilya. Masubo paminsaron nga mga tigulang na apang wala sa gihapon nakatibawas gikan sa lunang sang prostitusyon.
Sin-o ayhan ang dapat basulon? Sila bala ini ang mga tawo nga ginpabay-an kag gindalukan sang kahigayunan? Ukon sila ang mga tawo nga mahilig lang sa pahapos nga palangitan-an?
Ngaa bala nga tigulang na apang nagapadayun pa sa prositusyon? Wala bala sila sang kahigayunan nga magbag-o? Ukon mas ginapili nila nga indi magbag-o?
Apang nahibaluan nyo bala nga may mga prostitutes nga nangin santos? Isa na dira si St. Mary of Egypt nga nangin prostitute sa edad nga 12 anyos kag nagpadayun sya sa sulod sang 17 ka tuig. Apang natabu ang dako nga pagbag-o sa iya sang nag-upod sya sa isa ka pilgrimage sa Jerusalem para sa Feast of the Exultation of the Holy Cross. Nag-upod sya sa pilgrimage agud makakita sang dugang nga mga customers.
Apang nagpamat-ud sya nga magtan-aw sa mga pilgrims nga naga-venerate sa relic sang cross. Hinali lang may kun ano nga nagpugong nga indi sya makatabok pasulod sa duog kun diin nahamtang ang relic. Didto kag nagpakita sa iya ang imahen ni Virgin Mary. Nagpakitlooy sya kag nagpangabay nga pasudlon sa lugar, nagpangayo sya sang kapatawaran kag nagpangako nga talikdan ang iya makasasala nga pagsinalayo.
Sa iya kakibot, nakasulod sya gani bilang pagtuman, gintalikdan niya ang iya pagka-prostitute. Nagpabilin sya sa disyerto bilang hermitanya sa sulod sang 47 ka tuig. Sya ang santos kontra sa sexual temptations.
Ini nga sugilanon, pamatuod nga ang Ginoo milagroso nga nagahulag agud bag-uhon ang kabuhi sang tawo nga handa magbag-o.
Sa mga kababaehan, pasangkara ang inyo panulok. Kaangay sang sugilanon sang kabuhi ni St. Mary of Egypt, kamo man may paglaum nga magbag-o kag mag-usoy sang banas nga matarong.
Sa mga kalalakihan, dapat madula naman ang panan-awan sa mga kababaehan bilang bulong sa ila kauhaw sa pagpakighilawas. Mga babaye nga ginagamit lang nga palautwasan kun magtindog ang kaibog sa lawasnon nga kalipay.
Kita sa sosyodad, indi man dapat magkondinar sa sini nga mga tawo. Sila man may balatyagon. Kun ginhatagan lang sang patas nga kahigayunan pat-ud nga gusto man mag-usoy sang mas matarong kag disente nga banas sang kabuhi. (jpranco1975@gmail.com/PN)
