SANG sini lang, gin balita sang Panay News nga may mga 57 ka “job hires” sa Iloilo City Government nga ang ila kontrata sang nagligad nga bulan wala na ma-renew.
Sila bala gin pahalin gid nga indi na ma-renew ang ila kontrata? Kon matuod ini, ngaa?
Ang mga may kontrata tubtub Marso 31 nga wala na ma-renew, labi na gid ang kilala nga malapit kay Cong. Jerry Treñas, gapati ugaling nga ini sila nangin biktima sang mabaho nga usbong sang pulitika.
Ang ining suspetso nga may pulitika ang pagpahalin sa ila nag gwa sa naga-init na karon nga pagbanggianay sa possible nga pagpadalagan ni Congressman Treñas kag Mayor Joe III Espinosa sa pagka-meyor sa 2019.
Sunu sa sini nga pagpati, may pinasulabi gid ang pagpahalin sang mga “job hires”, lakip na gani ang pag-promote sang pila ka regular nga wala kuno masunod ang seniority sa pag-promote nga ginapatuman sang Civil Service.
Gin-deny ini ni City Administrator Hernando Galvez. Sunu sa iya ang ining mga “job hires” wala gin pahalin sa ila trabaho tungod sa “pulitika, relihiyon man ukon kolor sang ila panit.”
Gin paathag ni Galvez nga ang mga“job hires” may kontrata lang nga isa ka bulan kag, tungod sini, puede sila ma-terminate pagkatapos sang ila kontrata.
May mga serbisyo man ugaling nga gina-terminate, sunu pa gid sa iya, tungod ini sila “mga abusador, palaligoy, wala ga-cooperate…kag wala kita nagakangilin nga indi sila ma-renew.”
Well, kon sin-o gid ang gasugid sing matuod, ang publiko na lang seguro ang maghusgar sina. Kita diri sa aton kolum gasugid lang sang nagakatabo kag sang pagpati sang iban kon bala may pulitika gid man ukon wala.
***
Tungod man sining pag-terminate sang mga “job hires”, may mga namangkot ugaling sa aton kolum kon bala sa kadugayon nila bilang “job hires” ngaa indi pa gihapon sila mangin regular.
“Indi bala nga may kasuguan kita angot diri?” siling gani sang isa nga nag-angot sini sa problema sang ENDO, ukon pagpa-regular sang mga casual nga empleyado nga gin-pangako ni Presidente Duterte sadtong kampanya pa.
Ining isa nagsugid nga mga lima ka tuig na siya nga “job hire” pero wala gihapon sing nihoy kag nihay nga mangin permanente kag mangin regular siya nga empleyado.
“Ano gid bala ang ginasiling sang Labor Code?”pamangkot gani niya.
Well, indi abogado ang inyo kolumnista, kag ang mayo seguro amo nga ipamangkot ninyo ina sa kon sin-o nga abogado nga makabulig sa inyo.
Ang masiling ko lang nga ang Labor Code may paathag kon ano ang mga klase sang trabaho ang puede mahatag sa may luyag magtrabaho sa gobyerno, ukon sa pribado man.Ugaling, kinahanglan ini nga tul-iron sa legal nga paghangop, nga dira kinahanglan ang isa ka abogado.
Sa aton lang nahibal-an, ang Labor Code wala gani nagamitlang sang tinaga nga “job hire” nga isa sang mga puede ihatag nga trabaho sa gobyerno.
Tungod sini, ang aton pagpati sini nga nagatumod ining “job hire” sa temporary nga trabaho, labi na gid kay naka-kontrata lang ini sa isa ka bulan kag ma-renew lang kon kinahanglan gihapon ang ila serbisyo.
Sunu sa Artikulo 280 sang Labor Code, ang masunod nga mga trabaho nga mahatag sang gobyerno nagalakip sang Regular ukon permanente, kag Casual kon indi permanente nga pila man ka klase; kag Probational kon bag-uhan kag naga-training sa sulod sang anom kabulan nga puede mangin permanente despues.
May isa ugaling ka provision sa Labor Code nga naga siling: “An employment shall be deemed to be casual (if not regular); Provided, That any employee who has rendered at least one year of service, whether such service is continuous or broken, shall be considered a regular employee with respect to the activity in which he is employed and his employment shall continue while such activity exists.”
Nahangpan na ini seguro sang abogado nga luyag ninyo pamangkuton bahin sa kon bala puede kamo mangin regular bisan “job hire” lang nga sobra na sa isa ka tuig nga pag-serbisyo sa amo man nga trabaho. (w_mateojr@yahoo.com/PN)
