MAY ambisyon man gali sa pagdalagan sa pagka-Presidente si boxing-legend kag Senador Manny Pacquiao.
In fact, sadto pa ginsugid ining iya ambisyon sang iya coach nga si Freddie Roach, kag bisan sang boxing promoter nga si Bob Arum sa pagdaug sini sa pagka-senador sadtong May 2016 election.
Biib kita sa suporta sang mga pumuluyo kay Pacquiao. Todo suporta gid kita sa mga kadalag-an sini sa boksing. Halos tanan nga Filipino mga fans niya.
Ugaling, kon No. 1 siya bilang Filipino boxer, No. 7 lang siya sa 12 nga nagdaug sa pagka-senador. Pahangop ini nga lain man ya ang boksing sa panghimanwa.
Bag-o sini, nangin representative man siya sang Saranggani sa sulod sang duha ka termino sa idalom sang UNA Party ni anay Vice Presidente Jejomar Binay kag indi sang LDP-Laban, kon diin nagsaylo siya kag ginsaligan nga makabulig sa partido. Ginhimo pa gani ini nga Acting Party President.
***
Ugaling, amat-amat na ini nangin “obstacle” para sa kay President Duterte samtang nagahilapit ang presidential election sa 2022.
Sang sini lang gani, ginpakanubo sini ang “soft stance” kag “defeatist attitude” ni Presidente Duterte sa “bullying” sang China batok sa aton legal claim sa 200-nautical mile nga Exclusive Economic Zone (EEZ).
May sovereign rights kita diri nga may lubos nga kinamatarong sa pag-okupar kag pag-benepisyo sa ano man nga kaayuhan nga makuha naton diri.
Gintugyan ining EEZ sang UN Convention on the Law of the Sea (UNCLOS) sa aton kag sa iban pa nga pungsod nga katapo sang United Nations, nga nagalakip man gani sang Filipinas kag China.
Nanindugan si Pacquao nga dapat ipangisug naton ang aton kinamatarong sa EEZ, nga ginhangop ni Presidente Duterte nga nagaugyon siya sa position sang political opposition nga ginapanguluhan ni Vice President Leni Robredo sang ISambayan coalition.
Amat-amat man nga nabaton sang mga kapartido ni Presidente Duterte ang mensahe sang Presidente sa sining taliwas nga tindug ni Pacquiao.
Gani, nagpagwa sing sentimiento na ang pila ka nagapanguna nga myembro sang LDP-Laban Party ni Presidente Duterte agud sawayon na siya.
Sa isa gani ka asembliya sang partido, nakibut siya nga wala man lang siya naimbitahan diri. Gali kay nag-entra na ang Presidente, nga tsirman sang LDP-Laban, kag gintugyan ang paghiwat sang asembliya sa bise presidente sang partido.
Kon matuod ang ulihi nga balita nga nabaton naton, indi na acting party president si Pacquiao kag gin-islan na sang iban. Bati ta si House Speaker Velasco.
Sa isa ka survey, nga suspetso sang iban gin-lutong macao sang partido, naggwa nga samtang si Davao City Mayor Sara Duterte ang nagapanguna, si Pacquiao pang-apat lang.
***
Tungod sini, bati ta nga may nagatulod sa iya agud mag-upod sa ISambayan sang political opposition.
Katulad ini seguro sang ginhimo sang mautak nga anay Diktador Ferdinand Marcos nga sang napierde sa nominasyon sang Liberal Party, nagtipyok sa Nacionalista Party kon diin eventually nagdaug siya sa pagka-Presidente.
Pero sori gid, Mr. Pac-Man, wala man gana sa imo ang ISambayan.
“We are a coalition of democratic forces. We reject those who are identified with authoritarianism. We reject those who are responsible for extrajudicial killings or who abet extrajudicial killings,” siling ni retired Supreme Court Senior Justice Antonio Carpio sadto sa suhestyon nga basi pwede masuportahan nila ang kandidatura ni Davao City Sara Duterte sa pagka-Presidente.
Subong man sina ang siling ni Carpio, nga lead convenor san ISambayan, kon bala mabaton nila si Pacquiao sa ila grupo.
“There are many of us who do not agree with his position on extrajudicial killings. He’s also for the death penalty although he quotes the Bible,” siling ni retired SC Senior Justice Carpio.
So, quo vadis na, Mr. Pac-Man!/PN
