MALAPUYOT sa una, nagalas-aw sa ulihi na.
Sa bisan ano nga kahimtangan ang tanan naga-ibwal sa una apang makalipas ang higayon, makatapos nga makapanginaon, ukon maubos na ang iya nga pagadimdimon, ang nagahinay-hinay na ang nagapanginaon.
Aton hatagan sang pagtalupangod ang kabangdanan kon ngaa nagalas-ay ang pagtamdanay sang magkahagugma ukon bisan ang pagtamdanay sang duha ka tawo makalipas ang panahon.
Indi ka na matingala kon ngaa sang una kamo nagkilalahay halos indi kamo magbulaganay, magkaupod sa bisan diin nga kaladtuan, halos indi magbulag ang iya banas, ginapangita ninyo ang presensya sang kada isa sa tagsa ka tinion.
Tuman sa inyo katam-is, ang pag-updanay makahilisa, kag kaangay nga ang kalibutan sa inyo na nagatiyog.
Nagalipas ang panahon kag ang tanan nagakul-aw, nagakapanas, nagakapudpod, nagakalaya, nagakamalhan, kag iban pa nga isa ka natural nga madangatan sang mga bagay sa sini nga kalibutan.
Indi ka man matingala kon ngaa nagatulok sa iban nga tinuga ang imo kahagugma, nagakaganyat, nagakatentar, kag daw maatraka sa iya ginabatyag. Nagabalingaso ang iya balatyagon, nagadaludo sang madasig ang iya nga dugo, kag may tuhay siya nga ginabatyag nga indi niya mapahayag.
Ang tanan nga ini natural nga hitabu. Mas angay nga imo hangpon agud nga matul-id mo ang imo kaugalingon kag mahangpan mo man ang reaksyon sang imo kahagugma.
Kon nabatian mo sadto ang pahayag ni anhing Senadora Miriam Defensor-Santiago nga iya ginapabay-an ang iya bana sa paglagaw kag sa pagpagkigdogsing sa iban nga babaye, basta ang punta sang tanan nga magapauli ini sa iya.
Mahimo nga nahangpan na sadto pa sang senadora ang “Coolidge Effect.” Sa pagtulun-an sang biology kag psychology, ang Coolidge effect isa ka hitabu sa mga kasapatan kon sa diin ang lalaki, kag kon kaisa sa mga babaye, nagapakita sila sang kasupog sa ila sexual interest kon ipakilala sila sa bag-o nga babaye, apisar nga bag-o lang sila tapos sang pagpakighilawas sang iya nga sexual partner.
Matumod man ang ini nga epekto sa sekswal nga pagpabatyag sang lalaki kag gilayon nga pagtindog sang iya kinatawo. Bangud man ini sa ebolusyonaryo nga hitabu nga ang lalaki ang makatanum sang iya semilya sa madamo nga kababaihan kag ini nga sahi sang “mating system” ang ginatawag nga “polygyny” ukon ang isa ka lalaki may madamo nga babaye nga pares kag ang tagsa ka babaye ang may isa ukon pila lang ka lalaki nga pares.
Base sa pagtuon, may isa ka ilaga nga lalaki nga ginparesan sang ilaga nga babaye kon sa diin sila ang halos nagpakighilawas sang makaapat ka beses apang sa ulihi nagtahaw, nag-ugdaw, kag nagbugnaw ang ila kahidlaw.
Ginkwa ang babaye nga ilaga kag islan sang bag-o nga babaye nga ilaga, didto kag liwat nga nagkubot ang lalaki, nabuhi ang iya balatyagon kag ginkastahan ang bag-o nga kaupod.
Ginhatagan ko ini sang igtalupangod bangud man sa sitwasyon nga madamo sang magkahagugma ang nagakaproblema bangud indi nila matungkad ang rason nga dapat hangpon kag ini ang rason kon nga-a nga nasum-uran sila./PN
