MALAYO pa ang eleksyon sa Mayo13, 2019, nahibal-an na sang madamo kon ngaa madaug man gihapon si Congressman Jerry P. Treñas sa iya handom nga magbalik sa Iloilo City Hall.
Ina tungod may kaalam siya, foresight kag kapisan agud mahibal-an kon ano nga kaayuhan ang luyag gid sang iya mga constituent – negosyante man, mga trabahador, mga needy ukon ang mga pigado gid, kag kon diin dapat magpadulong ang siyudad pakadto sa kauswagan.
Pamatuod sina ang padayon nga pagpabilin sa pwesto niya bilang mayor sang siyudad halin sadtong 2001 tubtub 2010 san-o natapos ang iya 3-term limit, kag congressman halin sadtong 2010 tubtub 2019, kon san-o matapos man ang iya 3-term limit bilang congressman.
In fact, sa kada eleksyon, pirme lang daku gid ang iya abanse sa mga kontra sa eleksyon.
Kilala man siya sa iya wala pagkataka agud matatapan sing husto ang kinahanglanon sang mga pumuluyo.
Sa karon gani, ginapangunahan niya ang padayon nga pagtuon sang iya House Bill 656, nga nagahatag sing libre nga PhilHealth Insurance sa tanan nga mga Persons With Disability (PWDs).
Ining hagna nagapaseguro sang “rehabilitation, self-development and self-reliance” sang mga kauturan naton nga may sablag.
Mga1.5 ka milyon ining aton mga kauturan nga PWDs sa pungsod sa sining ulihi nga survey.
“Katulad sang aton pinalangga nga mga senior citizens, ang mga PWDs may ila man nga limitasyon nga nagapabudlay sa ila agud makakita sing palangitan-an. Kalabanan sa ila, nagakinahanglan pa gani sang hospital confinement kag medisina,” pahayag gani ni Congressman Treñas.
Angot diri mabalik pa siya sa Lunes agud atubangon ang ining padayon nga pagtuon sa HB 656.
“Kon indi ko mapatigayon ini, yara si (Congressman-elect) Baronda agud ifollow-up ini,” dugang niya.
***
MASILING ayhan naton nga may importansya, ukon “relevant” pa, ang oposisyon sa aton Demokrasya, pagkatapos nga sila napierde sing lubos sa pagka-senador sadtong Mayo 13 nga eleksyon?
Nga daan dominado na sang Administrasyon ang Kamara (House of Representatives) kag ang Senado, nga amo na gid lang ang paglaum sang oposisyon (nga importante sa Demokrasya) agud mapunggan ang mala-diktadurya nga sitwasyon sa Senado.
Sa nabilin pa nga boto – mga isa na lang ka milyon – daw wala kita makita nga paglaum nga makalusot pa ang bisan na lang si Bam Aquino, ang nabilin nga simbolo sangDemokrasya sa pagdaug ni anay Presidente Cory Aquino batok sa diktadurya ni anay Presidente Ferdinand Marcos.
In fact, sa pagkalutos sang isa kaAquino, nagdaug naman ang isa ka Marcos – si Imee Marcos nga sadto anak sang diktador nga si Marcos – nga ginakulbaan sang iban nga panugod liwat ini sang a la Marcos nga diktadurya.
Indi ta mabasol ang maluyag gihapon magpuyo sa pungsod nga Demokrasyahanon kag may Kahilwayan nga kulbaan tungod si Presidente Duterte kilala nga naga-idol gid sa kay Diktador Marcos.
But, of course, puede man kita magsala, nga daan indi na makapagusto ang Presidente sa pag-deklarar sang martial law sa idalom sang bag-o nga Konstitusyon.
Luas lang seguro kon amendaron sang gobyerno – Presidente, Kamara kag Senado – ang Konstitusyon kag ipatuman ang “unlimited term” sang Presidente, katulad sang yara sa Tsina nga madali ipatuman sang sobra ka poderoso nga Presidente, katulad sangsa aton.
Agud malikawan ini nga posibilidad – kag bisan gani sa idalom sang subong nga Konstitusyon – ang nabilin nga oposisyon sa Senado dapat may kaalam kag kaisug agud mangin “relevant” sa kinahanglanon sang importansya sang “dissent”, ukon pagpamatok, sa pang-abuso sang Administrasyon.
Kaya ayhan ini sang apat na gid lang ka senador sa oposisyon, nga sanday Drilon, Pangilinan, Hontiveros kag De Lima nga yara pa sa prisuhan? Beinte ka senador ang ila kontra, nga laban sini sa ila, (forgive our perception), mga “certified tuta” pa. May ikasarang ayhan sila agud mangin “relevant” pa sa away ni David kontra kay Goliath?
Puede seguro kon makahimo man sila sing significante nga gahod agud makabatyag kag mapahulag ang mga pumuluyo upod sa ila kawsa batok sa pang-abuso kag pagpatalang sang yara sa poder.
Otherwise, we are doomed to repeat history in the likes of the Marcos dictatorship and the eventual cry for revolution of a freedom-loving people! (w_mateojr@yahoo.com/PN)
