MAKAPILA ka beses na nga ginhambal ni President Rodrigo Duterte nga ginakapoy na sya kag handa man sya nga magbiya sa pwesto.
Sa isa ka pinakaulihi nga higayun, ginsiling sang President sa iya speech sa atubang sang mga negosyante nga kapoy na sya. Siling ni Duterte, “Gusto ko mahibaluan ninyo nga nagapaminsar na ako nga magpanaog sa poder bangud kapoy na ako.”
Masami ginarason ni Duterte nga sa pihak sang iya tuman nga pagpangabudlay, ara sa gihapon ang ilegal nga droga kag korapsyon sa gobyerno.
Ang kampanya kontra ilegal nga droga kag korapsyon amo ang nagapanguna nga plataporma ni Duterte sadtong presidential campaign. Nagpasalig pa sya nga maga-resign sya sa pwesto kun indi niya matapos ang problema sa ilegal nga droga sa pungsod.
Masobra na duha ka tuig sya sa poder pero sa gihapon madata ang ilegal nga droga kag may korapsyon sa gihapon sa gobyerno nga ginkaulamiran pa sang iya mismo mga tawo.
Ngaa bala indi matapos ang problema sa ilegal nga droga bisan pa linibo na ang napatay sa makahas nga gyera kontra droga sang gobyerno?
Ngaa bala may korapsyon sa gihapon sa gobyerno bisan pa ginakakas ni Duterte ang mga naulamid diri?
Una, ngaa madata sa gihapon ang ilegal nga droga? Ini bangud nga kun usisaon ang accomplishment sang kapulisan kag Philippine Drug Enforcement Agency (PDEA), lunsay lang small-time ang mga nadakpan ukon napatay.
Adlaw-adlaw halos may balita sang patay sa anti-illegal drugs operations pero mga ordinary lang nga tawo. Lunsay mga imol nga ginahimo suloguon sang dalagkuan nga mga illegal drug operators.
Bisan ang mga priso sa bilibid naka-operate pa sang ila grupo agud padayun ang pagbaligya sang ilegal nga droga. Maathag abi nga wala sang plano ang kampanya sa kontra droga kundi nasandig lang sa pagpamatay sang ginapatihan nga naulamid diri.
Ikaduha, sa kaso sang koprapsyon, matuod maabtik nga nakakas ang mga ginapatihan nga may kagarokan sa ila opisina. Pero ang problema ginasaylo lang sila sa iban nga opisina ukon indi gani ginapabay-an lang, wala man sang kaso nga ginapasaka.
Maathag nga ginakapoy na ang atun President sang panagang sang kritisismo sa iya administrasyon. Problema kay sa baylo nga magtrabaho sya agud mapangitaan sang solusyon ang problema, ginausikan ni Duterte ang ti-on sa pagsabat sang iya mga kritiko kag pagpakamalaut sa mga ini.
Makapoy gid man mag-atubang sa kontra kag sa matuod lang wala sila sang maayo nga mahambal sa gobyerno bisan may maayo pa nga hinimuan ang President. Kuntani sa baylo nga magsabat sa mga kritiko, trabaho na lang ang President sa pagpaayo sang dalagan sang gobyerno.
Itugyan na lang niya sa iya mga Cabinet members ang pagsabat sa mga kritiko.
Kun tun-an ang hulag ni Duterte nahadlok sya magbiya sa poder. Bisan pa ginasiling niya nga handa sya mag-resign, nahadlok kag indi sya magbiya kay ang ginakainitan niya nga mga Yellowtards ang magabulos sa poder.
Depensa lang na ni Duterte nga handa sya magbiya agud makakuha sang simpatiya. Sa matuod lang hadlok sya mag-resign bangud si Vice President Leni Robredo ang sigurado nga magabulos sa pagdumala sang pungsod.
Pat-ud gid nga may kalalagyan si Duterte kag iya mga minions kun magbiya sya sa pwesto.
Mr. President, pabay-e lang ang mga kritiko. Padayuna lang ang pagresbisyo sa mga Filipino. (jpranco1975@gmail.com/PN)
